雅虎香港新聞 【判決前夕】張秀賢：走完公民抗命的路，對得住自己
2014年雨傘運動9人被控公眾妨擾罪，案件明天（9日）宣判。自審訊結束後已經近四個月，9人明天將在庭上再聚首。九子之一的張秀賢面對判刑在即，他有感：「走晒成個公民抗命嘅程序，起碼我對得住自己。往後嘅日子，無論我喺咩崗位，起碼我喺呢個時間、呢個年紀曾經做過呢件事。」
眾新聞在判決前夕訪問九子，問及各人近四個月的經歷、面對可能入獄的準備、裁決對香港的意義。其中陳淑莊與鍾耀華不欲受訪。以下是張秀賢的回應：
審訊結束（12月14日）至今近4個月，怎樣運用這段裁決前的日子？
我呢4個月就公事上比較多。我呢兩個禮拜好努力去為我的網購代理生意搵潛在客戶 ，入到去（坐監）就未必有時間理，我而家努力啲去做啦。第二就係，我多啲時間去沉澱或者去吓旅行。我中間有去日本，仲有去台灣，一半時間做嘢、一半時間抖吓。
呢段時間，我都係寫嘢比較多，專欄、儲稿。台灣專欄呢，我寫咗勁多儲稿，因為到時驚有勁多delay，我驚啲信會寄唔出或者寄得耐。我會keep住寫，一個禮拜一篇，有時二、三篇。香港又好、台灣又好、網媒嗰啲都會keep住寫。
我入去寫嘅嘢，可能反而多啲人睇。因為我覺得入面寫嘅嘢，情緒會再沉澱啲，唔使再追住 Facebook或者media嘅push，即係唔使未必真係消化到件事，就要嘔啲文出嚟。入到去我又可以有時間睇吓書，又可能同其他人相處嘅時候都有啲得著，個人嘅、對政治嘅睇法，可能都有啲得著。
呢排都要收拾心情，睇吓入面可以做啲咩。老實講，都係見吓朋友，飯局比較多，差唔多個個禮拜都二、三場飯局。（大家都係道別嘅心情？）暫別啦，我諗我都未必真係坐咁耐，或者係一個好好嘅機會去回顧一吓。
我覺得係回顧自己 。老實講，香港日日都發生啲事，你根本無得停低落嚟去回顧，反而我覺得，入咗去嘅話，接收資訊嘅速度比較慢，變咗更加多時間，諗番可以做啲乜。
4月9日有可能還柙，做了甚麼準備？
我而家都輕鬆嘅，但當然呢排又開始緊張啲。我諗緊張都人之常情，我覺得嗰種緊張唔係話好驚坐或者點樣。我覺得，因為9號會唔會被收柙係唔知，咁個變數大到我自己都唔知點搞。我覺得變數嘅問題先令到個人可能會多少少緊張。一開始同我講坐幾耐或者有啲以前嘅案例可以睇嘅，咁都仲好啲，呢單case無嘢好睇喎。
（你有無參考黃浩銘嘅入冊指南？）我印咗出嚟睇，驚自己執漏。我都搞咗個支援組，講緊自己支援自己。其實自己坐監未必最難搞，可能你要其他人支援先比較麻煩。例如講緊探監名單呀、啲書都要搵人幫我入，或者幫我統籌，我自己喺入面咩都做唔到。
我會形容俗世嘅事務比較多，即係電話咩自動轉賬嗰啲嘢，填晒啲forms，張4000蚊form（關愛共享計劃），我呢排終於填咗去交。現實改變唔到，咪調節自己心態，既來之則安之，我又無做錯啲咩事，點解我要不安或者要好似好驚，我行得正企得正。
屋企人同朋友開咗 WhatsApp group。我有搵中學同學幫手，有搵各路嘅朋友幫手，講緊點收集啲信、點樣再寄出去，其實都已經搞咗。同埋我諗有啲信正委（香港天主教正義和平委員會）會幫手搞，所以其實都唔係真係咁麻煩。
我而家最掛心嘅係公司嘅嘢，因為網購代理生意起步無耐，而家咁樣搞都麻煩。不過我都有信心，就算無咗我，都搞得掂，公司有5、6個人。我個「立言（香港）」都已經交接緊，呢幾日都開緊會討論點樣處理。我覺得呢個係好嘅契機，執番好有咩喺手。
當然我覺得坐監梗係唔好嘅事，我都唔會將喪事當喜事辦，或者話好恨坐監，只不過係我覺得，你既然都要面對咁大嘅挑戰，我覺得人生上面呢個挑戰都算大嘅，喺廿幾歲嘅時候面對，總好過三、四十歲或者五、六十歲嘅時候面對，因為而家適應力比較強。
屋企人當然會掛心，但係我諗佢哋都知，遲早都會有咁杰嘅嘢啦。屋企人無嚟聽過審，無刻意搵佢哋，佢哋都唔會想嚟聽。入到去都唔係無乜機會見，一個禮拜都可以探到一次監，親屬一個月都探到二、三次監。我平時做嘢時間長，都未必同佢哋傾到咁耐。
你覺得裁決對於香港社會的意義是甚麼？
我覺得裁決嘅意義在於到底法庭點樣詮釋雨傘運動，同埋因為法庭都講過公民抗命嘅問題，咁佢點樣定性、即係喺法庭眼中係咩一件事，我覺得都係一個標誌嘅意義。但我覺得更加重要嘅係，你終於走晒成個公民抗命嘅程序。公民抗命我覺得係，除咗個行動之外，你去到最尾接受法庭嘅程序，或者接受個裁決、判刑，呢個先至緊要。
我覺得我喺呢件事選擇承擔嘅話，從自己出發，起碼都對得住自己。即係先唔好話講到件事好偉大，但我唔會話將個意義睇得太細，唔會太妄自匪薄，但我又唔會覺得件事大得好誇張，好似慷慨就義咁。大佬呀，衰啲講句，你都係坐監啫，又唔使死。你坐監唔會坐得多過旺角（暴動罪）嘅。如果你慷慨就義嘅話，咁旺角嗰班咪更慷慨就義。
我自己嗰時參與落去，覺得我完成成個process，走晒成個公民抗命嘅程序，起碼我對得自己住。往後嘅日子，無論我喺咩崗位，起碼我喺呢個時間、呢個年紀曾經做過呢件事。
我唔會搵人寫求情信，我都無做錯咩事。我喺呢件事上面唔會有悔意喎，我覺得悔意應該建立於究竟當時嘅處理手法，例如講緊同群眾溝通得好唔好。嗰啲可能會後悔，因為覺得自己想做得好啲，但如果話成件事，我唔會後悔。
觀看原文： 按此連結
