劉溫馨越級鬥視后 同定欣冇偈傾

藝人劉溫馨自小發「明星夢」，備戰多年終夢想成真。近日她終等到機會，與視后胡定欣角力鬥戲，更斗膽自揭雙方在片場「冇偈傾」！

當蔡思貝躍登視后、陳凱琳擁幸福家庭的同時，賽前大熱、最終卻只有「梗頸四」的同屆港姐劉溫馨，仍忙於為理想打拚！原來她的星夢源於經典內地劇《還珠格格》：「呢套劇可以話係陪住我成長，所以小學已經好想做演員。記得老師叫我哋寫篇文講『我的理想』，我諗都冇諗就寫好想演戲，當時覺得機會好渺茫，但唔知點解咁有大志，立誓要向呢個目標進發！」

溫馨的「廿四孝婆婆」為成全其理想，在她10歲時已出錢出力，讓她接受模特兒訓練，而她亦不負眾望，考入中央戲劇學院，2008年更被選為北京奧運火炬手，風頭一時無倆！不過她選擇回港選美，未有留在內地發展：「覺得依家唔選，老咗就冇機會喇！當時真係對自己好有信心，宣布賽果嗰刻覺得『我竟然冇份？』，但已成定局，都要接受。」

感恩做「媽咪」

在圈中浮沉7年，她總算捱出頭，更在新劇《白色強人II》與視后胡定欣「鬥戲」，她說：「今次個角色好強勢，對住咁多視帝及視后級同事，準備一啲都唔可以兒戲。我同定欣有好多對立場面，所以埋位前真係冇乜傾偈，等完成戲份先交流，應該唔會被傳不和啩！」

她感恩月前在《香港愛情故事》與石修上演「爺孫戀」，因而贏得關注：「好多網民為我打氣，話好鍾意我個角色，算係演戲以來回響最大嘅一次。坦白講，呢個角色得來不易，起碼要經過試鏡，同埋首次做人媽咪有啲緊張，但『老公』修哥真係好照顧我。（搵到代表作？）呢樣應該由觀眾評價。」