半夜搖晃嚇親！ 張敬軒以為餓到打鼓 唱《餘震》應景

香港昨日凌晨時分罕有發生地震，引起全城熱烈討論。張敬軒以為當時肚餓產生幻覺，而張智霖第一時間於群組報平安，幸好只是虛驚一場！

廣東省惠東縣對開海域昨日凌晨約2時半發生黎克特制4.1級地震，連帶本港多區均有市民感到震動，不少「夜鬼藝人」亦感到搖晃。張敬軒笑指當時誤以為「餓到打鼓」，產生幻覺：「有冇人知……啱啱係咪地震咗2、3秒，我以為自己半夜肚餓，餓到震親個杯。」他即拍片清唱首本名曲《餘震》，相當應景，他笑言：「IQ題：如果有餘震應該點處理？答案：要搵嘢浸住，因為餘震是浸沒痛苦中一絲興奮。」

廖碧兒開燈壯膽

張智霖同樣感受到輕微搖晃：「即刻喺群組問候朋友，不過覺得應該唔算好大件事。」廖碧兒則說：「我喺床度被郁醒，起初以為發緊夢，後來諗起屋企剛裝修完，係咪有小動物好似老鼠咁被困喺下面？因為我屋企曾經出現過蝙蝠！」她坦言一度不敢起床，後來決定開燈及電視壯膽。

至於家住新界區的羅子溢表示：「當時我同朋友傾緊電話，突然見到衣櫃郁，停咗隔2秒又再郁，我問朋友係咪地震，住喺九龍嘅佢呢個時候先feel到，我哋就講笑話今次嘅震源應該係由北向南，所以有『時差』。」而湯洛雯表示當時在睡夢中被震醒：「咩事？我以為發噩夢，瞓唔番……」35E咪神白雲同樣指當時整張床劇烈晃動數次，事後上載多張性感靚相幫大家「定驚」。