5大南瓜創意料理推介 釀海鮮南瓜批、南瓜金沙蝦球

10 月 31 號就係 Hahahalloween 啦！想感受下萬聖節氣氛嘅，今期搜羅咗五大南瓜創意料理畀大家，一齊睇吓有邊間啱食～

燒西班牙脆皮乳豬南瓜意大利飯 Amplifier Restaurant 

呢間西式餐廳嘅招牌菜就係佢哋嘅燒西班牙脆皮乳豬～乳豬外皮好薄身燒到脆一脆，一入口肥肉同瘦肉嘅比例啱啱好，肉質軟腍，鹹香得嚟帶陣陣油脂香。配埋底層嘅南瓜意大利飯可以中和油膩感，意大利飯有咬口，加左好多雜菌粒同南瓜醬超 Creamy，帶微微甜味，呢個鹹甜嘅組合真係絕配呀！

釀海鮮南瓜批 Peko Peko Eatery

健康主題新派西日 Fusion 菜，環境以木系及白色為主調，擺放咗唔同綠色植物作點綴。餐廳設有數十個戶外座位，室內食客都可以透過大玻璃窗欣賞海景，好 Chill 呀～釀海鮮南瓜批選用貝貝南瓜，粉糯清甜，入面係白汁配各式各樣嘅海鮮，如帶子、蝦、青口等，上層鋪咗大量拉絲芝士及三文魚籽，口感更豐富同時又多咗一份鹹鮮。

日本南瓜焗海鮮飯 新泰東南亞餐廳

主要供應泰國、越南、新加坡同馬來西亞地道菜式，而呢個日本南瓜焗海鮮飯就夠晒吸睛！飯加入南瓜粒、大蝦、鮮魷同青口等，然後鋪上滿滿芝士南瓜蓉再焗得焦香。焗飯嘅醬汁係充滿椰香嘅咖喱汁，配飯食真係一流。海鮮新鮮彈牙，非常足料。

南瓜粟米鮮肉餃 豐信餃子店

餐廳主打多款食材製作嘅手工餃子，有得揀湯餃或者煎餃。煎餃就香口啲，湯餃有得揀椰子海帶鮮雞豬骨湯，清香又唔會搶咗餃子味，重口味朋友可以轉酸辣湯底。南瓜粟米鮮肉餃咬落有絲絲軟糯南瓜蓉，夾埋新鮮粟米粒好清甜，好味又健康呀。

南瓜金沙蝦球 卅二公館

金沙蝦球平時就見得多，加入南瓜嘅你又食過味？呢間主打精緻菜式嘅中菜館，南瓜金沙蝦球薄脆嘅外層沾滿黃金醬，香脆不油膩，包住爽口彈牙嘅大蝦。亮點在於大廚巧妙地將南瓜加入金沙醬中，令醬汁食落唔會太膩，令人驚喜。

文: Yanica