又就到鬼節 細數港產恐怖片經典演員

香港本土出產唔少恐怖片，當中唔少陪伴住八九十後成長。就嚟又到7月14盂蘭節（今個星期五），我哋一齊睇吓香港恐怖片有邊啲經典專業演員，重溫佢哋對港產恐怖片嘅貢獻！

羅蘭

有「香港鬼后」之稱嘅羅蘭姐，拍過嘅恐怖片多到你唔信，絕對係港產恐怖片嘅靈魂人物。佢90年代首度演出電影《七月十四》中靈媒「龍婆」一角而爆紅，之後拍攝多部恐怖片《七月十三之龍婆》、《夜半2點鐘》及《陰陽路》系列等等，「龍婆」形象一直深入民心。之後羅蘭姐更以「龍婆」一角拍攝廣告，可以想像佢有幾紅。

雷宇揚

雷宇揚喺無綫多年一直做啲唔起眼嘅角色，後來轉戰電影圈，拍攝《陰陽路》系列而聲名大噪，拍完《陰陽路》系列後就去了做電台節目講鬼，成為「鬼王」。

邵音音

昔日三級片女星邵音音，八十年代轉型拍鬼片《人皮燈籠》、《猛鬼山墳》到後期嘅《迷離夜》、《碟仙碟仙》等。佢喺《迷離夜》飾演朱姐，喺鵝頸橋「打小人」一幕令人印象深刻，更獲提名金馬獎影后。

林正英

殭屍片代表人物林正英，一講起佢就會諗起著起黃袍嘅殭屍道長形象。林正英拍攝多部殭屍片《殭屍先生》、《殭屍家族》、《音樂殭屍》、《一眉道人》等等。佢憑住一系列殭屍片紅爆中港台，不過佢於1997年病逝，終年44歲。

李心潔

有「鬼后」之稱嘅李心潔因拍攝多套驚慄電影，《見鬼》、《救命》、《鬼域》而成名，李心潔憑住《見鬼》連奪多個電影頒獎典禮最佳女主角獎項。

王祖賢

有「最美女鬼」之稱嘅王祖賢完全顛覆我哋對鬼嘅認知，《倩女幽魂》中聶小倩一角擁有攝心嘅眼神，清秀脫俗嘅氣質，做鬼都可以靚到成個仙女咁。之後佢拍攝多部鬼片《畫中仙》、《飛越陰陽界》、《千年女妖》及《魔畫情》等等。

錢小豪

錢小豪可以講係殭屍片經典人物之一，當年殭屍片中林正英扮演道長，而錢小豪就係徒弟。隨著殭屍片係90年尾開始末落，錢小豪亦經歷一段長時間嘅事業低潮，直到前幾年拍攝《殭屍》而重新被新一代觀眾認識，上年再拍攝搞鬼喜劇《救殭清道夫》。

吳君如

未做《金雞》前嘅吳君如，喺八、九十年代拍攝多部鬼片《屍家重地》、《猛鬼撞鬼》、《猛鬼大廈》、《嘩鬼旅行團》、《一屋哨牙鬼》及《一眉道姑》等等，後嚟憑住佢搞笑形象轉拍笑片，更憑《金雞》成為影后。