反起跑線聯盟2｜小朋友演員大起底 9歲仔已榮登網民最葡萄嘅小演員？

ViuTV劇集《反起跑線聯盟2》本周進入結局篇，承接上一季嘅劇情，講述一年後七小福都升讀咗一所Happy School「樂天小學」，眾家長以及孔校長（袁富華飾）面對冼老師（朱茵飾）嚴厲和高壓教學方法嘅故事。《反起跑線聯盟2》一眾小演員成為亮點，除咗被朱茵大讚見到班小朋友就覺得好得意，同佢哋拍劇好開心，亦被網民大讚演技好好，尤其係飾演周家怡兒子嘅徐立德Billy仔一場喊戲令網民睇到鼻酸。即睇7位童星嘅背景。

徐立德（Billy仔）
Billy仔喺日前播出一集，眼泛淚光向媽媽（周家怡飾）道歉，喊到抽搐嘅演技獲一致好評。其實Billy仔拍攝《反起跑線聯盟》時仍然係幼稚園學生，但而家已經9歲並升讀聖若瑟小學，不過仍保留「天然呆」，相當可愛。除咗演技好，佢亦擅長打鼓及繪畫，好叻仔。

張晉樂（樂樂）
8歲張晉樂於《反起跑線聯盟2》飾演彭美嫦「孫仔」，外表可愛。佢就讀於筲箕灣崇真小學，興趣係踩滑板、跳舞、拍攝及同媽咪去旅行。

張曦晨（茶妹）
7歲張曦晨於劇中飾演「瑤瑤」，現時已經移居到英國，今次係藉暑假回港拍攝《反起跑線聯盟2》，而佢演出經驗相對較多，曾經參與過唔少廣告拍攝，及拍攝過TVB劇集《我家無難事》、《把關者們》。

王予殷
於劇中飾演楊飛、陳欣妍父母女兒「Yumi B」嘅王予殷今年7歲，當年拍攝《反起跑線聯盟》時係第一次拍電視劇。

植海維（Kyle）
8歲植海維於劇中飾演富爸爸潘燦良兒子Martin，性格好動。自細讀國際學校嘅植海維平日與同學及家傭都係用英語溝通，所以當年拍攝《反起跑線聯盟》最大嘅難度係要講廣東話。另外，植海維與徐榮細女徐心怡（包包）原來老友鬼鬼，由K1至小一都係同班同學。

孫詠軒（Hayden）
於劇中飾演練美娟及ERROR成員肥仔兒子「羅仔」嘅孫詠軒今年9歲，由家人經營嘅社交平台個人簡介中相當搞笑，寫道：「由細到大都愛笑嘅陽光」、「喜歡周圍飲飲食食嘅小吃貨」。佢嘅演出經驗機相當豐富，曾出演劇集《暖男爸爸》、《星空下的仁醫》、《和解在後》和電影《你咪理，我愛你！》，去年因為於《和解在後》被Ivy So（蘇雅琳）抱緊於懷中，而榮登網民最葡萄嘅小演員。孫詠軒不時都會接拍廣告，高峰期曾一年拍咗16個廣告。

林靖 （Alanna）
9歲林靖於劇中飾演「牢騷女」，演出經驗多多，曾拍過電影《闔家辣》、《流水落花》及TVB劇集《法言人》、《飛虎3壯志英雄》。林靖亦多才多藝，就讀私校弘立書院，曾於校際朗誦節和校際音樂節中奪冠，並且係「香港兒童合唱團」成員；佢嘅性格相當好，樂天善良，亦好少投訴。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！