反黑英雄︳53歲顏仟汶美腿低胸引人注目 網友野生捕獲真人讚「靚過劇中個女」

TVB劇《反黑英雄》入面，飾演癮君子「西敏寺」嘅顏仟汶成為劇集其中一個焦點，皆因劇中顏仟汶有齊毒癮發作、同個女嗌交、做企街甚至殺人等高難度戲份。而顏仟汶不時展露長腿甚至露少少事業線，引發網民反應。

近期《反黑英雄》嘅宣傳活動，顏仟汶都有現身，有網民喺現場影住顏仟汶，冇filter之下顏值依然超高，甚至有人讚「靚過佢劇入面個女（曾文心）」、「話係40歲都信」、「醫美痕跡不重」。

千禧年前後拍過唔少三級片嘅顏仟汶，而家收起性感洗盡鉛華，原來多年來都有唔少辛酸事。53歲嘅顏仟汶係TVB 1989年藝訓班畢業生，同屆同學有林家楝、甄子丹、黃德斌同黎芷珊等等，陣容強勁。喺TVB時佢以藝名亦羚演出，1996年離巢，到1998年轉投亞視，但係唔夠一年就因為一輯性感照而被亞視解約。

離開亞視之後，顏仟汶被王晶同李兆基睇中，邀請佢拍三級片。顏仟汶曾表示當時片酬數字好吸引，加上父親患癌、細佬妹年紀細等家境原因，於是放手一搏豁出去。自此顏仟汶幾年間拍咗大約50套三級片，雖然早幾年佢表示即使再拍都冇問題，但係有得揀的話會寧願讀好書唔入行。拍完一大堆脫戲之後，顏仟汶消失幕前一段時間，近2年先再復出，前年TVB播嘅《家族榮耀》入面，顏仟汶飾演李彩樺生母嘅好友芳姨。2022年底，HOY TV劇集同期播放《黑金風暴》同《獅子山下的故事》，顏仟汶2套劇都有份，分別飾演圍村村民同埋海味店太子女，造型截然不同。顏仟汶去年參加《中年好聲音2》，但係連100強都不入，事後佢相當失望。

感情生活方面，顏仟汶喺亞視期間同杜汶澤拍過拖，分手之後杜汶澤同咗田蕊妮一齊。之後顏仟汶結識圈外人阿Lo，拍拖結婚仲一齊搞餐廳，但喺2016年離婚收場。離婚後顏仟汶被指同已婚契哥詹秉熙有親密來往，搞到絕交收場。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！