反黑英雄｜倪嘉雯被封「嫩版Yoyo」 張馳豪彈琴激搶Fo 原來係文武雙全？

TVB劇集《反黑英雄》正熱播，近日劇情焦點除咗落喺阿占（丘梓謙飾）及阿怡（曾文心飾）身上，社團千金嘉露（倪嘉雯Carmen飾）與PTU警員阿政（張馳豪Aska飾）呢Pair亦獲關注，當中網民更大讚倪嘉雯靚女，擁有滿滿仙氣，十足「嫩版Yoyo」，指佢無論樣子、笑容甚至聲線都有陳自瑤初出道嘅影子；而於劇集其中一幕大騷琴技嘅張馳豪就被激讚搶晒Fo，擁陽光笑容又型仔。

倪嘉雯於2020年加入TVB，多客串女記者或網台主持等角色及女主角嘅少女版，包括於《換命真相》、《雙生陌生人》及《十八年後的終極告白2.0》飾演年青版「楊紫山」、「利梓楹」及「沈越」等等，又曾先後擔任兒童節目《Think Big天地》、《Hands Up》主持，直至去年有份於《新聞女王》飾演記者Amber一角，有幸與視后佘詩曼（阿佘）同框拍劇。

張馳豪於早前《反黑英雄》其中一幕化身鋼琴王子，雖然佢自嘲自己彈琴麻麻地，只係自學識彈少少chord，未達至表演級數，但其型仔樣吸獲滿滿正評，網民紛紛指張馳豪一出場就被佢嘅顏值吸引。張馳豪於2020年透過歌唱選秀節目《聲夢傳奇》入行，縱然十二強止步，但無阻之後嘅發展，曾擔任《男神廚房》嘉賓，亦與潘靜文（Sherman）包辦《你的晚安我的早餐》作曲、填詞及主唱，更推出《十八年後的終極告白2.0》主題曲《色彩背面》以及作曲《聲夢傳奇2》嘅主題曲《我超越我》。而張馳豪早於高中時已去美國讀書，大學曾修讀運動生理學學士學位，畢業後再讀咗一年體適能碩士，當時亦已考獲健身教練牌，係一個健身教練和體適能教練，絕對係文武雙全。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！