否認換獎!許廷鏗親揭唔做《聲夢》導師原因

·3 分鐘文章
否認換獎!許廷鏗親揭唔做《聲夢》導師原因
否認換獎!許廷鏗親揭唔做《聲夢》導師原因

ViuTV首個音樂頒獎禮《Chill Club推介榜 年度推介20/21》完滿結束,賽前被喻為奪男金大熱人選的許廷鏗(Alfred)最終只憑《無力感》先拔頭籌獲「Chill Club 年度十大歌曲」獎之一,更與男歌手三甲無緣。問到他會否感到失望?他笑話:「黐線!唔係啦!反而見到咁多單位攞獎我係好開心,覺得新、舊歌手係打成一片。」續提起頒獎禮期間跟陳柏宇、馮允謙等的K房演出,他說可跳出頒獎禮固有的莊重框框:「件事好睇就係一齊玩,好似開Party咁,冇年代嘅間距、唔會再覺得樂壇係青黃不接。」

許廷鏗好Enjoy頒獎禮!
許廷鏗好Enjoy頒獎禮!

問到事前有否對奪男歌手獎抱期望?Alfred說:「想唱歌多啲,唔覺得一年嘅成績就有定義,嚟緊會涉獵多啲唔同類型嘅音樂,如果下年中可以再上台,就係最佳反映到有人支持自己嘅音樂,今次真係一啲失落都冇,好Enjoy呢個頒獎禮。」

許廷鏗唔做《聲夢傳奇》導師,係因為合約問題。
許廷鏗唔做《聲夢傳奇》導師,係因為合約問題。

對於日前有指他為攞男金而向ViuTV表忠,不惜推掉無綫選秀節目《聲夢傳奇》導師一職,Alfred無奈笑說:「邊有得咁樣換㗎?我喺台上面都講咗只要尊重音樂質素,有需要我嘅地方我都會出現,呢個年頭邊會仲有換獎?」繼而坦承無綫有邀請他做導師,只是因當時跟前唱片公司仍有合約問題未解決,故未能答允:「中間有啲轉折嘅時間。(無綫會唔會誤會你?)呢行冇咁多誤會。(如果再邀請你會做?)都係嗰句,只要係尊重音樂本質、需要我就會出現。」

再講到有傳他會重返星夢,目前是自由身的他聞言大笑兼否認:「邊到聽嚟㗎?咁就繼續傳啦!(星夢有冇接觸你先?)從來都冇斷過接觸,同過去嘅唱片公司都保持友好關係。(有冇向你招手?)有傾偈,但冇理由問人有冇意欲簽我,同埋我不嬲都同緊自己團隊合作,所以唔使太擔心我工作上嘅問題。」

MIRROR一共拎到8個獎。
MIRROR一共拎到8個獎。

另外,男團MIRROR以團隊及個人身份共奪8個獎項。其中姜濤及陳卓賢(Ian)除了分別獲「Chill Club 年度男歌手」銀獎及銅獎之外,亦奪十大歌曲獎,前者於台上講明不會再重現於年頭頒獎禮的「O嘴」樣,因自認「O嘴」好難睇,同時幸好上台可戴口罩遮掩驚訝表情:「呢個賽果係超出預期,覺得林家謙攞金獎係好犀利,亦見到Ian攞獎開心過自己攞。」後者則表示完全冇諗過攞銅獎,上台致謝時終體驗腦袋一片空白滋味,笑嘲是輸經驗,講到他漏多謝女友Amy,他說:「多謝身邊支持我嘅所有人!(覺唔覺得早排啲是非影響票數?)前排係經歷咗啲事好大壓力,今次攞獎係支好嘅強心針。」