吳鎮宇粗口文化 為基層發聲

自言是深水埗人的「影帝」吳鎮宇，在新片為社會最低層發聲。對於電影因粗口對白被列為三級，他不認同，認為是「貼地」的地區文化。

吳鎮宇在電影《濁水漂流》為基層發聲，控訴香港樓價高，籠屋與豪宅往往只是一街之隔的荒謬情況。片中因有不少粗口字句，如「把Ⅹ」、「係咪好Ⅹ好恰先」等，被列為三級，鎮宇則認為是「貼地」的深水埗文化，他說：「粗口係呢個區嘅文化，去深水埗行兩個圈，呢啲就係佢哋嘅生活習慣。」

為演活癮君子角色，他特別與兒子到深水埗視察，不認同該區被標籤成罪惡溫床，反而覺得有昔日街坊街里的人情味，他說：「我基本上係深水埗人，暑期工有幾年跟阿爸做點心，所以每條街賣緊乜、有乜美食我都知道。依家都冇乜點變，拍戲收工都會慢慢行吓，眨吓眼就行過咗深水埗，去到啲高級地方、名校，感覺幾有趣，一邊係一堆籠屋，另一邊係豪宅，好似兩個世界咁。」並提出反思問題，假如香港沒有深水埗會怎樣？他說：「冇晒啲cheap人，全部都係中環、銅鑼灣靚人，會係一個乜嘢嘅香港呢？」

鼓勵李麗珍向前看

他透露戲中有不少金句，大眾必有共鳴：「戲裏面有一句係最想講嘅，『我哋呢啲瞓街嘅，係咪好恰先？攞綜援係咪一定要跪喺度先？』好值得大家思考。」提到戲中女主角李麗珍近一年父母先後離世，令她大受打擊，鎮宇鼓勵說：「想同珍妹講聲，人始終要走，未走嘅人就繼續努力啦，睇好佢問鼎影后。戲中嗰班人都有幾痛嘅經歷，但依然努力生存，希望佢去睇戲，借呢部戲同佢加油。」