【回憶返晒嚟】朱茵麥長青《閃電傳真機》後 相隔27年再度同台

喺內地綜藝節目《熟悉的味道》日前（3日）播出嘅最新一集，佢哋搵咗「性感女神」朱茵做嘉賓，節目仲安排佢同麥長青（麥包）聚頭。兩位舊拍檔繼《閃電傳真機》後，相隔27年喺北京再度同台。朱茵為答謝麥包，佢特意準備多個驚喜俾麥包，場面既溫馨又感動。

喺節目中，朱茵講述自己初入行嘅經歷，當時只有21歲嘅佢得到唔少前輩嘅指導，其中麥包對佢嘅影響係最深，係佢演藝事業上第一位伯樂。朱茵話就算大家都想早收工，只要身為前輩嘅麥包覺得拍得唔滿意嘅時候，佢會同導演組堅持同埋傾點樣可以令節目拍得更有趣。佢好鍾意同麥包合作，係一個值得學習嘅對象。朱茵仲話兒童節目係佢第一份工，機位嗰啲會唔係好熟。佢記得有一次出外景，佢走出鏡頭外，搞到俾導演罵，嗰時佢喊咗出嚟，因為覺得好委屈。而麥包就喺身邊安慰佢，所以同麥包做拍檔就冇壓力。

為咗答謝麥包，朱茵親自準備多個驚喜，第一個驚喜就係安排新演員見面會，俾麥包同一班後輩交流同分享演戲人生。期間麥包大爆朱茵喺電影《逃學威龍》單手遮眼嘅經典場景，原來係一個美麗嘅意外，當時朱茵其實係喺眼度生咗粒暗瘡，所以先要用左手遮住隻眼。

而第二個驚喜就係親手炮製梅菜扣肉，朱茵除咗同主持人一齊去街市買餸之外，佢仲將約會地點裝飾到好似當年 《閃電傳真機》嘅場景。唔講唔知原來呢道菜係佢哋嘅共同回憶，因為麥包最鍾意食梅菜扣肉，嗰時幾乎每日都會同麥包食飯，而佢每一餐都會點呢個菜。麥包見到梅菜扣肉之後，佢就好感動話朱茵係第二個為佢煮呢道菜嘅人，佢個女今年要去澳洲讀大學，喺暑假返嚟嘅時候就係煮咗呢道菜。之後，佢仲大讚朱茵廚藝有大廚嘅水準。

《閃電傳真機》係唔少80後必睇嘅兒童節目，當中環節《鼠洞》及其主題曲《小老鼠與大花貓》係經典中嘅經典。而第三個驚喜就係讀出《閃電》粉絲嘅來信，佢哋都邊讀邊流淚，場面相當感動。