「地道」星期五影院: 《跑馬地的月光》

曾幾何時香港有好多都市小品愛情電影︰繁忙嘅生活，無數嘅偶遇，未至於係感情天書但至少有共鳴。簡單啲講男女主角唔一定係富n代，雖然電影美化左佢地嘅生活條件，但起碼要返工，要喺麵包同理想之間掙扎下。

今日唔講90年代港產片，費事個個星期五都考古咁，睇返套近少少，就算係千禧BB都會識嘅男女主角：張智霖同佘詩曼主演嘅《跑馬地的月光》。

張智霖一向有型靚仔，近年活躍於電影、電視同內地綜藝節目，後生仔就算唔睇戲同電視，睇廣告都一定認到佢，某大餅店嘅廣告都幾舖天蓋地下，仲未計護膚品果啲，除非唔出街，否則都幾難睇唔到！而女主角佘詩曼拍左無數TVB劇集，早早入哂屋，就算唔睇TVB都怕且知道佢喺《延禧攻略》入面做嫻妃啩？

張智霖同佘詩曼呢pair配搭，緣起於2000年，係TVB仲捧得起新人、大家又好鍾意睇大台劇集嘅年代。當年推出咗以澳門做背景嘅《十月初五的月光》，套劇當年好紅，連首主題曲《祝君好》都好hit下，「寧願沒擁抱共你可到老 任由你來去自如我心底仍愛慕」，個個識唱咁滯。不過《跑馬地的月光》個故事同《十月初五的月光》一啲關係都無，純粹食住套劇嘅聲勢，用對銀幕情侶拍電影。

《跑馬地的月光》有3條愛情線，全部喺跑馬地發生︰第1條線係Ben(張智霖 飾）同Jenny (余詩曼 飾）。Ben因為科技股爆煲而失業，喺人生低潮時遇上Jenny，2人都有開餅店嘅夢想，傾下傾出感情。第2條係阿龍（蔡一智 飾）同Michelle (江希文 飾），阿龍雖然行古惑不過充滿傻氣，為左追到女神咩橋都出齊，最好笑係終於追到女神，偏偏緊要關頭記唔起女神住幾樓幾室……第3條線係狗仔隊Ricky（蘇永康 飾）同3線明星仔敏儀（姚樂怡 飾），Ricky以其專業知識幫助樂儀製造話題，一夜之間知名度大增，連帶2人關係極速升溫。《跑馬地的月光》3對男女都無大團圓結局，不過現實又有幾多對持續愛到幾多歲？談戀愛係好高難度㗎！

不得不提，今時今日好好戲嘅余詩曼，99年剛開始拍劇《雪山飛狐》、《刑事偵輯檔案IV》時都被劣評雞仔聲、無表情，1年後擔正《十月初五的月光》做「祝君好」時演技開始進步，「君好」同「初哥哥」呢一對成為2000年代經典螢幕情侶之一，所以先有電影《跑馬地的月光》、《月滿抱西環》同2015年《十月初五的月光》（電影版）。

所以再有天份嘅演員都要有機會磨練，各位影視前輩慨嘆「香港無明星」、「青黃不接」的同時，記得俾多啲機會新人，幫演藝圈爭取多啲實際嘢。香港唔係無人才，無咩表演平台就真，連街頭表演都無位呀！