「地道」星期五影院: 《秋天的童話》

今日（9月7日）適逢陳百強60歲生忌，天氣預測週末又會氣溫稍降略有秋意，就同大家重溫下香港文藝愛情經典 ─《秋天的童話》。因為，呢部係陳百強最後一部電影作品。

呢套由張婉婷執導、羅啟銳編劇嘅愛情經典，喺1987年上映，卡士有當時得令嘅周潤發、鍾楚紅同陳百強。電影翌年獲得香港電影金像獎最佳電影、最佳編劇同最佳攝影等殊榮，男主角發更憑《秋》再膺金馬影帝。

相隔31年，「船頭尺與十三妹」嘅感情故事依然歷久常新，畢竟唔少浪漫愛情片，都有身份差距＋日久生情嘅劇本元素。

電影講述「十三妹」Jennifer （鍾楚紅 飾）努力儲錢去美國讀書兼探望男友Vincent（陳百強 飾），但人生路不熟，到埗之後陪伴十三妹嘅人唔係男友，而係當初抗拒、認定為鄉下佬又粗鄙嘅遠房親戚船頭尺（周潤發 飾）。2人由背景、價值觀都唔同，船頭仲大十三妹十年，卻喺幾個月嘅相處中互生情愫。

戲中陳百強飾演嘅男友Vincent，同船頭尺嘅草根、麻甩正正相反，Vincent喺美國讀書、教育水平高、興趣夠晒文青仲靚仔有型，所以就算女友係鍾楚紅都唔足以令佢專一，連為自己花心辯護都文藝過人，搬埋Woody Allen出來話「感情如鯊魚，唔向前游就會死」！

如果角色唔係由貴公子氣質嘅陳百強做，Vincent就會變成極度討厭嘅世紀賤男；就因為有Danny做呢個高質筍盤，觀眾先能夠代入十三妹嘅患得患失。

電影其中一幕經典場面，就係十三妹見過Vincent新女友時問船頭尺「我今日靚唔靚，有幾多分？我靚啲定佢靚啲？」。感情面前人人平等，再靚嘅人都會無自信，希望從他人身上求安慰，無咩讀書嘅船頭尺最心水清，就話「成條街最醜係你呀！」。

唔夠自愛又點會肯定自己嘅好？可惜最後互有好感嘅2個人，並無一齊到。「你會好鍾意同佢一齊，好輕鬆好自在，但你唔會嫁俾佢」，係十三妹對船頭尺嘅無奈，到而家可能都係唔少女性嘅感情現況。電影結尾，留低多年之後嘅再次相遇……

故事本身有導演張婉婷唔少嘅自身經歷。導演自己喺紐約生活過，了解紐約嘅美麗。戲入面船頭尺喺夕陽下跑住追十三妹咁唯美嘅一幕，係劇組每日一到5點就要拍一次先有嘅呢個Magic Moment，發哥要跑足十日先拍到個good take！

《秋天的童話》其實係導演繼《非法移民》之後、「移民三部曲」嘅第二部曲（第三套係《八兩金》），拍出當時華人移民生活嘅面貌。唔係個個住大屋，亦有生活艱難、難以融入嘅一面，同埋人在異鄉要適應成長嘅過程。

戲種唔係當年大熱嘅通俗喜劇，不過卡士口碑夠照，結果電影上映之後票房大收，成為當年全年票房第五位嘅賣座片，亦係香港影壇一套令人回味再三、叫好叫座嘅愛情經典。