雅虎香港新聞 【基金定存零存整付】一蚊投資係乜嘢玩法
平日唔小心在街上跌了一蚊，你都會猶豫執唔執好，不過原來一蚊都用來投資，既可以買基金又可以玩定存。
一蚊買基金免認購費
虛擬銀行來勢洶洶，傳統銀行都積極推出低門檻網上理財服務提升競爭力。恆生就新推出買基金入場費低至一蚊為賣點的「SimplyFund」基金投資服務。開戶方法好簡單：
先開立或已持有優越理財、優進理財、Green Banking、綜合戶口、智多Kid理財戶口，其中Green Banking及智多Kid對象分別係年輕人及小朋友，並豁免結餘總值要求及月費，所以毋須擔心使用「SimplyFund」在戶口級別上要達標。
到「SimplyFund」網頁登入並開立戶口，或透過恆生個人流動理財App「投資」項目內「其他投資服務」揀「開立SimplyFund戶口」。
「SimplyFund」最大賣點係買基金一蚊有交易，如果收認購費客戶用一蚊買基金就要倒貼，因此「SimplyFund」豁免認購費改用現時大熱的月費模式。投資組合價值5千元以下0月費，組合價值5千到十萬，月費都只係20元。
聽落確實抵玩，不過暫時「SimplyFund」只提供七隻基金選擇，其中恆生環球高增長基金、恆生環球均衡增長基金、恆生環球債券基金屬於組合型基金（Fund of Funds），即係基金投資組合主要押注基金或ETF，換言之你買這類基金就係透過基金買更多基金，基金經理買賣基金時要支付認購費及贖回費，直接加重管理成本。考慮到這一點，想進取些可考慮「SimplyFund」中的恆生指數基金或恒生中國新經濟指數基金，前者持有恆指成份股，後者重倉股包括騰訊、阿里巴巴、京東、百度，正切合中概股回歸熱潮。保守一點可以揀恆生香港債券基金，投資組合主力押注新世界、希慎、恆基等本地巨企發行的債券。
一蚊定存可選擇港元、人仔或美元
一蚊除了可以買基金，亦可以用來玩定存。虛擬銀行眾安的定存服務就以一蚊入場費為賣點，現時可以揀港元、人民幣及美元，三者入場費都低至一元。存款期靈活由一個月到一年任揀，存款期越長息就較高，例如人民幣定存12個月存息就有1.6%。
落水投資儲蓄，你都唔會真係每月儲一蚊，想小額儲蓄仲可以考慮強積金自願性供款（SVC）或零存整付。SVC雖然不像可扣稅自願性供款（TVC）般有得扣稅，但就沒有65歲提款限制，供款人可隨時提取權益。但如果你正供款的強積金計劃基金回報平平，你可能又到另一間受託人開戶，想提款又要入表申請，想簡單到底就可以考慮改用零存整付。
零存整付即月供存款計劃，在供款期內逐月存入本金，並以複息計算利息，即每期利息加上本金不斷滾存利息，雖然以現時息率小額儲蓄利息滾存回報有限，但亦不失為儲蓄的額外甜頭。不過零存整付精粹係鎖死資金一段長時間，落水前須有決心堅持完成整個供款期。
伸延閱讀：
