太太生足14粒鐘勁驚險!洪永城B女出世做福星

·2 分鐘文章
太太生足14粒鐘勁驚險!洪永城B女出世做福星
太太生足14粒鐘勁驚險!洪永城B女出世做福星

恭喜!洪永城今日(23日)宣布B女已出世,並在社交網分享喜悅,更代B女「發文」,相當有心思:「大家好,我叫Amber,係人馬女,重6.2磅,想同大家打個招呼,我在荃灣港安出世,我一出世,姐姐同叔叔就話『嘩,好似爸爸呀!』跟住我望望爸爸媽媽,我有唔開心,因為我想似媽媽多少少,媽媽好靚。我知道媽媽痛了十四小時,催生了兩次,都開唔到宮頸,但係佢堅持到最後一刻,我聽到佢每2分鐘就痛一次,我仲聽到爸爸話隻手就斷,媽媽好偉大。多謝張智醫生哥哥、Ruby 姐姐同呢度所有的護士姐姐, 你哋好有愛,好照顧我,我會快高長大、孝順同好乖,會照顧媽媽,帶歡樂畀大家....哈哈,至於爸爸,我好肚餓,可唔可以快去搵奶粉錢呀。」

太太梁諾妍表示:「媽媽會好好照顧你,我會係你最強嘅後盾,辛苦晒張智醫生同所有護士姐姐!最重要多謝洪生(隻手😂)的陪伴,每當我作動時痛到又暈又想嘔真係差啲扭斷佢隻手,辛苦你了😂!分享一下生產過程先,由於催生藥幫助唔到我開宮頸,痛咗十幾個鐘迫到羊水都穿埋,宮頸都唔肯開,醫生話避免寶寶危險就要開刀,最後母女平安寶寶很健康,寶寶出生後就即刻喊,連我跟住大喊咗出嚟,見到洪寶寶平安地出生,甚麼痛楚都唔緊要了,一切都很值得,謝謝上天給我們一位小天使,期待我們一家相處的日子!」

洪永城則說:「B女出咗世喇!母女平安,放心我會好好照顧佢,令佢成為一個健康、快樂同開心嘅小朋友,佢係一個福星,帶咗好多快樂畀我哋,可以同我哋過冬至、聖誕節、新年同農曆新年,佢出世係Perfect Timing。」

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能