《失戀時，我們總以為自己永遠放不下⋯⋯》

每個失過戀嘅人都問過：「為何永遠放不低？」點解前度就好似冤鬼一樣，陰魂不散，去到邊做緊咩都會諗起佢，好似個心空咗一忽，好似永遠都無法彌補。

曾經有一段時間我係朋友間嘅失戀吐苦水專員，每個失戀朋友都會話：「我忘記唔到！我放低唔到！我諗我無辦法鍾意第二個人啦！」然後半年或一年後，當事人一樣搵到下一個，一樣開始到新嘅戀情。而我仲記得佢當初呼天搶地話今世只愛佢一人⋯⋯做人嘅嘢，未到最後都唔好講到太大。

又有一個男性朋友對初戀念念不忘，佢曾經話過無一個女仔可以代替佢，自己會繼續等，等到有日初戀回心轉意。我同一班朋友叫過佢無限次算數啦，佢都拒絕。最後，佢上網識左個女仔，仲話計劃緊三年後結婚。

被人飛之後總係以為自己係世上最慘嘅人，不停問自己做錯咩，對方點解要咁對自己，曾經對自己好好嘅人今日竟然咁狠心。明白既，失戀係好痛，但只會係痛一陣子。時間會改變一切呢句老套說話係千真萬確嘅，失戀可以做嘅就係放任自己喊放任自己呼天搶地一陣，唔使刻意搵下一段感情，因為你喊夠啦做夠悲劇女主角啦，就自然識得重新上路。

一世人流流長，唔分手都唔代表會同你白頭到老啦～又點會永遠都走唔出失戀傷痛呢？傻豬～