奧運時刻｜「鄧謝配」奧運最終章 謝影雪賽前受傷「連牙膏都唧唔到」 出局與鄧俊文哭成淚人：感恩遇到你、冇放棄我｜Yahoo

港隊羽毛球混雙組合「鄧謝配」最後一屆拍檔出戰奧運，惜八強止步，鄧俊文同謝影雪賽後哭成淚人。接受傳媒訪問時，謝影雪在鏡頭前釋放情緒，公開講述負傷備戰的辛酸故事，透露「兩三個星期前，我仲喺醫院急症室」，甚至「連牙膏都唧唔到」，身旁的鄧俊文一邊聽一邊哭泣，二人要多次拿起比賽用的運動毛巾拭淚。

賽前受傷患困擾的謝影雪表示，曾擔心無法出發去巴黎參加奧運，「兩三個星期前，我仲喺醫院急症室，喊住同Dr Yung講，問佢點算，問我仲去唔去到（奧運）？」幸得醫生支持進行治療，但傷患亦影響謝影雪的訓練及情緒，她指「我過去一個月可能喺球場每日都喊，佢（指鄧俊文）都受咗我好多！」

謝影雪進一步透露賽前傷患嚴重，「我一個月前連吱牙膏都吱唔到，梳頭都梳唔到，到今日可以完成今次奧運，好多謝所有人嘅幫助。」她感謝拍檔，「好多謝俊文喺我不能練習都一路做好自己，亦都無怪我受傷、怪我病，多謝佢一路都堅持。」

一眾記者顧及謝影雪泣不成聲，把咪高峰移向鄧俊文請他開腔，他指「嚟奧運前一個月，真係好辛苦、好辛苦，無論身體同心理都承受好多」，此時謝影雪更要用毛巾掩蓋臉部抹淚水。落淚的鄧俊文續指，「我哋喺奧運計積分前個成績真係好差，我哋兩個真係一分一分咁頂返嚟」。對於今屆的表現，他認為「雖然最後攞唔到獎牌，正如阿雪所講，我哋真係盡咗最大努力，一分一分咁打返嚟，所以對我哋嚟講都算滿意。」

今屆是「鄧謝配」奧運最後一舞，記者叫二人向對方表達心底話。謝影雪率先回答，她望望身旁拍檔表示，「好感恩遇到你！本身打完女雙之後有諗過可能要退役，但我遇到你呢，我哋高高低低咁多年，我又受傷咁多次，你都冇放棄我。其實亞運完、爭奧運資格前，其實我都見到有好多留言叫我退役等俊文搵一個更好拍檔，我有懷疑自己、對自己無信心，我都問過佢不如你搵過個好啲嘅拍檔，但佢都堅持繼續夾我，所以我好多謝你冇放棄我！」

鄧俊文同樣向拍檔致謝，「 其實我哋夾咗咁多年，受傷嗰個唔係我，但我喺隔離望住佢每一次受傷，都好戥佢辛苦」他指運動員由受傷到康復，再到重回高水平，是一件很艱難的事。「好多謝佢咁多次受傷都冇放棄」，又指「如果七年前冇遇到佢，都未必有今日嘅鄧謝配、未必有今日嘅鄧俊文。」