奧運 fun fact｜何詩蓓由 18 歲首戰「唔係好知發生咩事」到巴黎奪銅 土生土長混血飛魚堅持為港而戰｜Yahoo

1. 何詩蓓於女子 200 米自由泳決賽游出 1:54:55 成績，為香港奪得一面銅牌，成為香港第一位連續兩屆奧運奪得獎牌嘅運動員（而張家朗則喺同日稍後時間，成為首位衛冕金牌嘅香港運動員）。網民都話有牌已經非常之開心！大讚何詩蓓好叻女！

2. 何詩蓓同張家朗一樣都係 1997 年出生，佢係香港、愛爾蘭混血兒，而香港係佢土生土長嘅地方，講得一口流利廣東話，佢對香港有深厚感情，曾透露愛爾蘭多次招攬佢代表出戰，佢都拒絕，原因佢熱愛香港、對代表香港感到非常自豪。

3. 今年何詩蓓摘下世錦賽金牌，喺多哈世界長池游泳錦標賽 200 米自由泳賽事，佢由頭帶到尾，以 1 分 54 秒 89 的佳績勇奪冠軍，亦係香港史上首面長池世錦賽金牌。而喺佢非個人主項嘅蛙泳賽事中，亦奪得銅牌，連佢自己都講笑話：「我依家可能係蛙泳泳手了？」

4. 回帶前兩屆里約奧運（2016 年），係何詩蓓首次出戰，當年喺 200 米自由泳中，雖未能晉身總決賽，但佢已創下歷來香港女泳手嘅最佳成績。當時佢話：「第一次參加奧運只得 18 歲，唔係好知發生咩事，希望第二次奧運真係達標，入到決賽。」而最終佢喺東京奧運願望成真，為香港奪得首面游泳獎牌，一攞就係銀牌！

5. 何詩蓓左後肩上有個奧運五環紋身，代表著佢 2016 年出戰里約奧運，創下首名香港女泳手晉身 16 強嘅歷史，記住自己視東京奧運為目標嘅決心。自東京奧運，何詩蓓打開咗獎牌之門，愈戰愈勇。

6. 何詩蓓英文本名係「Siobhan Berndette HAUGHEY」，佢嘅父親係愛爾蘭人，母親係香港人。佢嘅中文名係撮取其本名每個字嘅頭兩個英文字母，即「Ha Si Be 」，發音同「何詩蓓」三字相近。

7. 何詩蓓就讀跑馬地嘅聖保祿中學，曾經係中學校內辯論隊成員、仲有八級鋼琴底子；DSE考獲 35 分佳績，考完 DSE 之後去咗美國密歇根大學讀心理學，為咗游泳而放棄多姿多彩嘅校園生活，每天清晨 5 點就會準時起來練習，練 3 個鐘就繼續上堂，上完堂又繼續練習。甚至喺學校泳池暫停開放期間，佢轉到冰冷嘅湖泊操水，而水溫度只有大概 10 度，練到「頭髮都結冰」。

8. 今日已為世界游泳冠軍嘅何詩蓓，6 個月大嘅時候經已戴上泳袖去泳池，但佢細個並唔鐘意游水，覺得游來游去冇咩新意，更因為日日見到泳池而喊。但當時父母話「游泳係生存技能」，令佢不得不堅持下去。

9. 何詩蓓父親家族喺愛爾蘭政界顯赫，佢叔公係已故愛爾蘭前總理 Charles Haughey，父親嘅堂兄弟 Sean Haughey 為現任愛爾蘭眾議院議員。

10. 今次係何詩蓓第三次出戰奧運，喺開幕禮上更同張家朗一同擔任香港持旗手。除咗剛完成嘅 200 米自由泳，佢嚟緊仲會出戰 100 米自由泳，力爭獎牌，希望大家繼續為佢同香港運動員打氣！