奧運 fun fact｜從東奧飲恨狂講「對唔住」到巴黎奧運金牌 江旻憓：我終於冇輸！｜Yahoo

1. 江旻憓奪金後接受訪問，佢喊哂口多謝咁夜唔瞓睇佢比賽嘅香港觀眾，強調「唔想冇打出香港精神」，又話好想贏多次世一畀另一邊「膝頭哥」（江早前兩度受膝傷困擾），笑言要用世錦賽同奧運兩個冠軍「送畀」兩邊膝頭。

2. 上屆東京奧運江旻憓八強止步，賽後眼泛淚光，不停講「對唔住」；因為佢打輸，亦自責打得心急，「我會再練多啲」、「我可以更好」，睇到人心痛。今屆講明不只在乎參與，強勢殺入決賽成功奪金，江旻憓唔單止贏咗好多劍手，更加贏咗自己！佢賽後激動話「我終於冇輸喇！」

3. 呢場決賽江旻憓對住有主場之利、世界排名第 6 嘅法國劍手瑪露，開局曾大落後被拉開比數 6 分之多（賽制係先取 15 分者勝）；但江旻憓憑換劍後改變戰局，喺 3 局入面追成平手，最後憑延長戰「決一劍」一劍刺中對手奪金，實至名歸。

4. 其實江旻憓係高材生嚟架！2012 年成功考進美國史丹福大學，修讀國際關係學士學位；2021 年 9 月入學香港中文大學攻讀法律博士課程（J.D.）。

5. 呢位香港劍后自今年 3 月登上女子重劍世一寶座，不過佢喺 2017 年同埋 2019 年，兩度遭受十字韌帶撕裂之苦；上月亞錦賽亦再因傷退賽，今次奧運可謂克服傷患再創高峰。

6. 江旻憓 2 歲時隨父母舉家移民加拿大，6 歲時回流香港，自小學習跆拳道，她曾稱自己喜歡重劍，原因係重劍動作有啲似跆拳道。

7. 江旻憓 11 歲開始正式接受女子重劍訓練，13 歲時嶄露頭角，越級取得 2007 年全國少年錦標賽 U17 組冠軍。

8. 江旻憓多次締造香港隊歷史，佢係首位贏得世界盃（四次）同大獎賽（兩次）嘅香港劍擊運動員，亦係香港首位世錦賽獎牌（女子重劍）得主，目前世界排名第一。今屆江旻憓晉身奧運決賽奪金，又再刷新香港劍擊運動史新紀錄。

9. 「微笑劍后」江旻憓曾表示希望日後能夠加入聯合國工作，佢亦喺今屆決賽後話想同哂所有女劍手講「我愛佢哋」！

10. 江旻憓決賽後喊住話辛苦哂香港觀眾！咁夜仲要睇佢比賽，佢希望大家快啲瞓覺！

11. 同張家朗一樣，江旻憓奪金後，可獲「賽馬會優秀運動員獎勵計劃」頒發 600 萬獎金。Vivian 今次奪金，相信亦會成為好多機構爭取合作嘅對象，繼續人氣高企；除咗劍擊場上，大家往後應該仲有好多機會見到佢喇！