奧運 fun fact｜比奧運金牌更強的人 兩屆奧運金牌 — 劍神代名詞張家朗｜Yahoo

1. 有咩好過攞到塊奧運金牌？就係攞兩塊奧運金牌！張家朗喺巴黎奧運決賽落後下追平意大利對手馬治，決一劍第一次刺中對手出現爭議，未被判為勝方，唔緊要！冷靜第二次再刺中對手，都仍未被判為冠軍，專注再嚟！終於喺第三劍、連續三個爭議分下奪金。佢賽後不忘感謝教練，當時不斷喺身後提醒佢要忘記冇分嗰一劍。決一劍變決三劍，張家朗能夠冷靜執行教練指示同自己格言「Don’t lose your way」，盡顯強大心臟！佢賽後表示，同上屆一樣，希望將金牌送畀父親做生日禮物。

2. 前隊友透露，唔好以為張家朗喺勝利後流露嘅自信係咁輕易。自東京奧運奪金後，佢曾試過喺其他比賽甚至練習賽都落敗，亦會有傷患，有時張家朗都會懷疑自己，但係佢都一一跨過難關，呢種態度先係劍神真正過人之處。

3. 力爭衛冕嘅張家朗喺賽前受盡壓力，事關奧運史上要咁樣蟬聯只有 2 位運動員做到，對上一次要數到 68 年前，今屆張家朗打破奧運長年魔咒，可謂劍神創造神話。

4. 今屆 16 強賽事時，張家朗對戰中國選手莫梓維時，對方跣腳受傷，張家朗即刻收起把劍，兩度拍拍對方肩膀問候，顯出向對手嘅尊重同體育精神。

5. 呢位身高 193cm 嘅劍神，以反勝「Comeback King」見稱，相信大家仲記得上屆佢喺東京奧運奪金一刻，就係以 15:11 反超意大利劍手勝出，今屆決賽嘅意大利對手馬治亦係率先取得 14 分嘅一方，而張家朗一度跌進落敗邊緣，再後來居上獲勝，有評論甚至認為佢「愈落後打得愈起勁」（編按：同時令唔少香港市民血壓上升呀！）。

6. 今屆江旻憓攞到金牌，張家朗又奪得金牌，唔少網民喺 Threads 上面話想睇兩位劍神喺巴黎呢個咁浪漫嘅地方「原地結婚」。其實呢段網民幻想嘅「緋聞」上屆東京奧運已開始，但係張家朗當時就落閘，澄清「好多人問我同 Vivian（江旻憓），我想講其實我哋係冇嘢嘅，我亦都唔係鍾意佢」。

7. 風光背後，張家朗劍擊生涯並非一帆風順，東京奧運奪金後，原計劃再次代表香港出賽中國全運會男子花劍個人賽及團體賽，但係喺賽前一天，佢不幸喺練習導致左膝腫脹，須緊急返港接受治療。專科醫生診斷他的半月板受傷，雖然傷勢不算嚴重，但仍需數星期嘅休養先可以恢復練習。張曾喺東京奧運後揚言下一個目標係全運會金牌，可惜最終因傷退賽。於是佢再努力實現下一個目標，就係喺今屆巴黎奧運再次奪金。

8. 劍神最驚嘅係咩呢？原來係昆蟲！佢嘅前隊友喺電視台大爆，劍神最怕就係蟲蟲。雖然佢喺賽上場能夠主動攻擊對手，但一見到蟲蟲就會大嗌「唔好呀！」

9. 張家朗曾經同影帝周潤發一齊拍封面，兩位都係深得香港人喜愛嘅公眾人物，呢個組合成為一時佳話。發哥笑言自己都要做小 fans，表示非常之欣賞呢位年輕人，更加以招牌自拍動作同劍神留影。

10. 張家朗自東京奧運奪金之後成為廣告商寵兒，VISA card、國泰、Nike 等大品牌都搵張家朗代言，當中要數最引來網民關注，係佢為 Dior 代言時嘅廣告照片，一改運動員形象成為時裝代言人。

11. 張家朗習慣每日飲咖啡，自言說話上比較怕醜嘅佢，喜歡透過社交平台同網民交流，IG 擁有超過 40 萬 followers，佢不時喺 IG 分享飲咖啡嘅喜好，亦試過喺 Threads 以「在線等」問大家飲邊款咖啡好，詢問網民意見。

12. 張家朗嘅另一興趣係收集波鞋。作為波鞋控嘅佢，喺體院同屋企擁逾百對波鞋。今屆出戰四強時，張家朗則戴住品牌 Van Cleef & Arpels 嘅經典四葉草手鏈、Cartier 手鐲同埋 Hoorsenbuhs 戒指，都引來網民注意，亦可見佢對打扮嘅熱愛。

13. 張家朗 16 歲喺亞青賽狂掃四金開始，7 年內贏盡亞洲季軍、亞洲冠軍、世青冠軍、奧運冠軍，但遇到嘅失敗亦有好多，試過「放負求安慰」嘅佢，曾打輸比賽一哭二鬧發脾氣，結果換來爸爸「溫馨提示」：「仲喊？輸咪輸，返去檢討再嚟過。」

14. 張家朗於頒獎禮後表示，仲未相信自己已經攞到金牌，感覺同第一次攞金牌時一樣，都係仲未敢相信，不過都係好開心，特別係佢教練喺法國人，能夠喺巴黎奪金張家朗份外開心。佢希望香港可以更多人參加劍擊運動。

15. 1997年出世嘅張家朗，現時 27 歲，從 19 歲第一次打奧運，來到今年第三屆。其實張家朗好細個時已經喺小學紀念冊上就寫下成為奧運冠軍嘅夢想。今日嘅佢不單達成夢想，更衛冕奧運冠軍！佢特別多謝通宵睇直播支持佢嘅香港市民，話知道大家第日要返工都繼續唔瞓支持佢，令佢好感激！