寵愛Pet Pet｜周嘉洛備受力捧再做男一 被網民指擺脫不了金城安兼扮星爺

周嘉洛憑TVB處境劇《愛·回家之開心速遞》廢青「金城安」一角成功入屋，前年更開始「升呢」擔任劇集第一男主角，明顯備受重用。正在熱播中嘅劇集《寵愛Pet Pet》就由再當男一嘅周嘉洛及視后林夏薇主演，雖然男女主角配搭新鮮，再加上劇集輕鬆搞笑，不過網民認為周嘉洛演繹好「金城安」feel同扮周星馳。

《寵愛Pet Pet》係周嘉洛繼《痞子殿下》再一次擔正做男一，今次嘅拍擋仲要係視后級人馬林夏薇，佢喺劇中飾演性格樂觀由善解人意嘅寵物讀心師汪聲仁（Golden），更與林夏薇飾演嘅金惠婷（Paula）展開一段鬥氣冤家嘅姐弟戀。劇集播出已經超過一星期，網民雖然睇得出周嘉洛落力演出，有網民大讚佢演出充滿喜感及做得唔錯，留言話「有觀眾緣」、「佢做得幾好，套劇都好睇呀」及「演得到沒有問題 幾好笑，新鮮肉」等等。

不過同時亦有網民指佢嘅演技浮誇、演繹好「金城安」feel同扮周星馳，例如「呢套擺明捧金城安」、「佢啲戲好似太誇，唔太討好」、「over得濟，太扮星爺，做返自己啦」、「金城安d戲好over好尷尬」、「做左幾年都係依type」、「又金城安飾演金城安」、「又扮星爺」、「但佢始終未試過做同金城安完全唔同嘅角色，搞到定哂型」、「啲戲太誇，戲路窄，唔太討好」、「d戲over晒 戲路又窄」、「成陣星爺味」、「睇安仔好似睇緊愛回家」、「最近覺得金城安嗰樣愈來愈似黃（王）祖藍」、「周家（嘉）洛扮夠周星馳未」及「周星馳上身」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！