小眾品味 英國專造好玩車

一講汽車強國，你會諗起邊個國家？德國民用車夠多款夠先進；日本車又平又慳油仲好耐用；意大利嘅跑車就舉世聞名……好似數嚟數去都未數到英國車，其實曾幾何時英國車都好巴閉，你問下啲長輩，以前香港通街都係柯士甸（Austin）、摩利士（Morris），嗰啲磨地雞、咪拿仔、迷你谷巴，全部都係英國車，當然仲有勞斯萊斯、賓利、「大貓」（積架）、Daimler、MG……無嘅，嗰時香港仲係「事頭婆」年代，英國車梗係威到盡。

Caterham 7已經出過好多版本，呢架650S係650R嘅街道版，不過聽講行街都仲係太硬淨。

可惜，英國汽車工業而家已經今非昔比，以上講嘅汽車牌子，九成九都已經唔係英資擁有：勞斯萊斯一早比寶馬收購咗；賓利就收歸德國福士旗下；積架同Land Rover而家就屬於印度Tata，由大英帝國轉移到前英殖民地手中；MG仲賣咗俾中國上海汽車，改咗個鬼咁娘嘅名叫「名爵」；仲有MINI（寶馬）、Aston Martin（Investindustrial）、蓮花（Proton）甚至係倫敦地標「的士」（吉利），都全部賣晒去外國。所以，當你睇英國汽車節目如Top Gear之類，啲主持仲係度吹捧英國車有幾威有幾勁，都只不過係自我安慰，因為你知我知大家都知，「英國車」呢三個字，早已名存實亡。

TVR好神秘，車展出show都唔開樣，不過網上就有呢張預相圖，架車嘅規格都好吸引。

不過呢，英國人又真係特別鍾意車，當今F1車壇最巴閉嘅，係人稱「黑帝」嘅英國車手咸密頓，以前仲有大量著名賽車手，例如Jackie Stewart、Stirling Moss、James Hunt、Nigel Mansell、Damon Hill等等數之不盡。英國人去Track Day、Festival of Speed之類活動更加係家常便飯，玩車文化非常深厚。唔駛講咩吖，淨係玩MX-5就已經夠出神入化，而家除左日本之外，最多MX-5零件嘅地區，分分鐘就係英國。

Noble M600來自李斯特郡，加上名人效應同Yamaha V8引擎，絕對唔會輸俾麥拿侖。

好奇怪，一個咁鍾意車嘅國家，竟然無乜聽講過佢搞國際大車展，你以為倫敦車展會好有睇頭，錯喎，原來對上一次舉行已經係8年前嘅事。今年嘅倫敦車展成功翻叮，但論規模都真係唔及上個月北京車展嘅一半，更莫講話要數有啲咩全球首發新車。不過呢個咁本土化嘅車展，原來可以睇到英國車嘅最新走向。

老實講，民用車真係冇乜新意，反而好多非街道用嘅Driver’s Car就幾精彩，例如一啲究極級嘅單或雙座位Track Car，其中有個名大家應該唔會陌生，就係Caterham 7，今次車展擺咗架最新版620S，即係賽道用620R嘅孖生細佬，同樣有310匹直四機械增壓引擎，但係換咗套冇咁硬嘅避震連彈弓，同埋可以調校軟硬嘅蝦鬚，方便啲人買嚟揸出街。呢啲車，即使俾你買返香港都唔知出唔出到牌，咁樣睇，做英國車迷又真係幾幸福嘅，至少鍾意呢啲車嘅話都唔駛偷偷摸摸，可以光明正大攞牌出街。

倫敦車展仲有呢架墨西哥造嘅VULH，雖然唔係英國出品，但呢類車就最啱當玩車族嘅口味。

另一個大家熟悉嘅英國Driver’s Car牌子係TVR，無錯，你無聽錯，TVR參加倫敦車展，而且帶埋架新車去添。不過，廠方擺明玩嘢，揭開塊車布之後……入面係一架包實黑色車笠嘅唔知咩車！完全睇唔到個樣，但亦無損TVR迷哥迷姐嘅熱情，因為已經有幾百人喺未睇車嘅情況下落咗訂。點解可以咁有信心？除咗買TVR個名之外，亦因為廠方請到設計大師Gordon Murray操刀，即係麥拿侖F1嘅設計師。而今次車展有一樣嘢落實咗嘅，就係呢架跑車重量只有1,150kg，配用告士禾夫（Cosworth）調校嘅V8引擎！大佬，個個名都響噹噹，啲人梗係爭住落訂啦。

講到名人效應，點都唔夠Noble M600犀利，同款車曾經上過Top Gear俾Jeremy Clarkson同Stig寵幸過，因而聲明大噪，加上間廠開喺李斯特郡，即係出爐英超冠軍之地，更加有話題性。架車本身都唔嘢小，用Yamaha調校嘅4.4公升V8雙Turbo引擎，662匹馬力，絕對唔會輸俾另一間英國超跑麥拿侖，而架車只有唔夠1.2噸，齋睇數字都知佢肯定快到黐線，原來0-100km/h只需要3.5秒！其實無論造車歷史、賽車往績，以至設計師、車手、車隊同車廠，英國本土都有好豐富嘅資源，亦造得出好似Caterham、TVR同M600呢啲咁出色嘅跑車。雖然英國車一直只係小眾玩意，無緣登上國際舞臺，但亦都可能係呢種Niche味，令唔少人都特別鍾情英國車。