《巾幗梟雄》四奶奶柴九好經典 鄧萃雯點名祥仔促成好事

演技備受觀眾肯定嘅鄧萃雯（雯女）, 近年養尊處優，減少幕前演出，觀眾都好少機會欣賞佢嘅演技。自從12年拍攝完劇集《金枝慾孽貳》後，佢就同無綫脫離賓主關係，主攻內地市場。直至上年，大家先喺ViuTV劇集《婚內情》 再一次睇到佢演港劇。

日前雯女接受資深電視人楊紹鴻同江美儀主持嘅電台節目《一起走過》訪問，雯女有講到自己當年投考訓練班入行, 又講之後因拍攝《薛仁貴征東》而戲假情真戀上萬梓良，因萬梓良係佢「亦父、亦師、亦友」，所以成長喺破碎家庭嘅雯女好仰慕佢。

雯女雖然曾拍攝《金枝慾孽》及《女人唔易做》等熱播劇，但之後都冇乜大製作搵佢，所以佢向監製李添勝自薦拍《巾幗梟雄》，佢亦都向李添勝講明想同黎耀祥（祥仔）一齊拍。雯女話留意咗祥仔好耐，欣賞佢嘅演技，但佢一直都做配角，好想同佢合作。添哥亦好幫忙，成功喺其他監製手上將祥仔搶過嚟。之後，鄧萃雯同黎耀祥就係2009年及2010年先後拍攝《巾幗梟雄》及《巾幗梟雄之義海豪情》，口碑同收視都超級好，最高收視達47點，仲分別憑角色柴九及四奶奶攞埋視帝視后，證明雯女真係好有眼光，同時亦令二人成為好朋友。