張敬軒多倫多演唱會台上剖白曾患躁鬱症 台下有觀眾大笑叫囂激嬲軒公「有少少著咗」

近期舉行北美巡迴嘅張敬軒，當地時間上周六（3日）於鄰近多倫多的瀑布區舉行演唱會。張敬軒多年未有喺當地開騷，全場門票開售後8分鐘已告售罄，黃牛價更一度少上8百幾蚊加紙（約港幣4600蚊）！

一票難求但唔代表觀眾識珍惜，張敬軒喺台上剖白自己創作《笑忘書》一曲時曾患上躁鬱症，自爆病情最差嗰陣門口都出唔到，但佢選擇堅持落去，並感謝歌迷多年來嘅支持。有多倫多觀眾睇完show之後喺社交平台控訴，軒公講緊呢段經歷時，台下竟然有人大呼小叫甚至大笑，認為有人需要學吓演唱會禮儀。有觀眾留言話佢坐嘅位置附近有觀眾睇show時好嘈，甚至有人喺觀眾席飲酒飲到醉，仲舉杯嗌cheers！就連張敬軒都喺呢個帖文留言話「我都有一下少少著咗」。

根據資料，張敬軒呢次演唱會喺Fallsview Casino OLG Stage舉行，可以容納約5千名觀眾，位置距離多倫多2個鐘車程嘅尼亞加拉瀑布區，演出場地喺正賭場入面。而場地資料顯示，會場有提供酒水嘅售賣處，觀眾可以買完酒入場飲用。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！