微辣前經理人阿晶抑鬱驚傳死訊 千字遺言控訴微辣

網路頻道微辣前經理人Jane（阿晶）驚傳於澳門逝世，而微辣亦喺社交平台發聲明，表示「得知前員工不幸離世，本公司對此深感哀慟及遺憾，並向其家屬致以深切慰問」。

阿晶近日喺社交平台發文，表示與抑鬱症共存四年，「現在去多人的場合前都必須要先吃鎮定劑」。有傳媒前日擔心出事而同阿晶聯絡，當時阿晶有回覆。殊不知尋日阿晶於IG以預訂時間發布「最後帖文」，最終發生憾事。

喺2021年離開微辣嘅阿晶，同呢個平台有過不少瓜葛 － 阿晶曾與成員之一加蔥拍拖，分手後更爆出加蔥曾迫阿晶墮胎嘅事件；阿晶又曾被指離開微辣後搶走舊同事嘅廣告job。阿晶2年前離職時，曾經開直播指微辣老細六豪子「喊住留自己」，微辣多位成員後來紛紛用濾鏡post喊樣相，被網民認為係明寸阿晶。

而阿晶在離世前的多個帖文中，對各種指控及不滿有所解釋，包括否認有搶job，並表示一眾成員嘅「po喊相事件」令佢受攻擊，認為向有份po喊相各人道歉當日係「人生最委屈一天」。阿晶又控訴曾被人用電話通知「有兄弟想搞死你」以叫佢收聲。

不少網民認為阿晶出事同微辣有極大關係，紛紛留言鬧爆。而微辣多名成員出po悼念阿晶，亦有人發文與事件「割席」。曾經po過喊相嘅2位微辣女成員佩男同思男，喺阿晶逝世後分別否認有霸凌行徑。而阿晶舊愛加蔥未婚妻、微辣成員儀仔亦發文澄清冇搶人男友，又話同阿晶只係同事。

至於微辣深夜發出嘅聲明就指「該員工兩年前離開團隊後，與微辣文化已無合作，惟對她生前面對的困難，尤其是有人透過電話對她作出恐嚇，微辣文化重申，上述行為與微辣文化仝人無關，亦從來沒有管理層計劃作出以上舉動。若本公司發現任何人以微辣文化名義，向他人施以恐嚇行為，本公司將保留追究權利」。微辣同時宣布，本來於8月舉行嘅十周年演出亦將會延期。

防止自殺網求助熱線：

賽馬會青少年情緒健康網上支援平台「Open 噏」：http://www.openup.hk

香港撒瑪利亞防止自殺會： 2389 2222

利民會： 3512 2626

生命熱線： 2382 0000

東華三院芷若園： 18281

明愛向晴軒： 18288

社會福利署： 2343 2255

撒瑪利亞會熱線(多種語言)： 2896 0000

醫管局精神健康專線： 2466 7350

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！