愛·回家之開心速遞｜楊明加入演雷公私生子 網民唔buy揚言熄電視罷睇

TVB處境劇《愛·回家之開心速遞》長拍長有，劇集不時會加入新角色，為觀眾帶嚟新鮮感，好似前晚（3日）嗰集就有由楊明飾演嘅雷公（白彪飾）私生子「虹豆沙湯遠」加入，今次係佢出獄後首次拍長駐劇集，佢喺劇中性格戇直又充滿正義感，有指TVB想透過正面角色幫他「洗底」，不過唔少網民都唔多受落，仲揚言話要罷睇。

早前楊明指自己已經重回劇組，獲公司安排拍攝皇牌處境劇《愛·回家之開心速遞》，而前晚佢終於登場，劇情講到雷公向John（何啟南飾）透露當年因情傷，所以前往吳多國沙漠流浪，期間遇險時獲「奮世疾族」華金公主所救，並獲族長賜予金箭及將女兒許配俾佢，但因發生族裔戰爭而離開，後來知道公主為佢誕下囝囝「虹豆沙湯遠」（楊明飾）。John擔心影響繼承利益，所以搵嚟騙子（謝可逸飾）冒充私生子，可惜被雷公識破。露出賊相嘅騙子仲用利器要脅雷公，咁啱經過嘅「真私生子」（楊明）就出手相助，不過二人就未有相認。

劇集出街後，雖然有網民支持楊明，留言話：「楊明飾演虹豆沙湯遠，個名好搞笑。支持楊明，加油。」及「其實楊明係實力派演員，演戲唔錯，之前睇好你攞視帝，不過欠缺運氣，運氣起起跌跌揸車出事，希望今次有機會演愛回家，東山再起，唔好令支持你既粉絲再次失望，繼續努力加油」等等。不過有唔少網民唔受落，仲揚言要罷睇，例如「唔咪嘛，楊明？！」、「楊明擺明醉酒駕駛, 仲可以上電視!? 品行有問題」、「想睇何賊多啲」、「正負資產，後台咩料係都要攬到實」、「失德偽人都有工開」、「寧願叫番細龍太番黎好過」、「已轉台」、「罷看這節目」、「以後每次做呢幾個人嘅集數都可以熄機休眠啦！」、「有冇搞錯，處景（境）劇點會加依條友架？又唔識做戲，完完全全浪費成套劇集，麻煩盡快踢佢出劇組，唔好一個人影響成套劇」、「不喜歡楊明，所以在他出場時已經關了電視。」、「熄機」、「同樣係醉駕 一個無得留低 另一個坐埋監 竟然可以加入」及「最憎呢條友同佢女友，真討厭」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！