愛回家丨應屆落選港姐王嘉慧客串拍劇 爸爸係「內地傢俬大王」兼擁有高學歷

無綫處境劇《愛·回家之開心速遞》長拍長有，劇集不時會加入新人，除咗為觀眾帶嚟新鮮感之外，同時亦可以給予新人機會。劇集最近又有新人加入啦！佢就係飾演接龍集團市場部職員兼阿壯（焦浩軒飾）心儀對象Gina嘅王嘉慧（Cathy）。

喺星期日（3日），《愛·回家之開心速遞》劇情就講到阿壯因為「童顏」嘅關係，被女朋友嫌棄及經常被人誤會係學生。佢成功約到女神Gina，不過又因為童顏問題，而被對方嫌棄。之後，阿壯從衣著及髮型方面改造，希望可以成為一個成熟嘅男人。佢仲搵咗清潔部嘅同事幫佢改造髮型，不過就搞到嚴重M字額，頭髮生唔返出嚟之餘，Gina亦唔再理佢。

現年27歲嘅王嘉慧自細成績優異，成功考入名校聖保羅男女中學，之後再於英國公開試GCE AL中考獲5*成績，入讀倫敦大學學院（UCL College）修讀心理學，並獲得一級榮譽及Dean‘s honour list。畢業返港後再於中文大學修讀法律博士。至於家族背景方面，Cathy爸爸係著名傢俱公司創辦人，有「內地傢俬大王」之稱，公司曾經係美國上市，喺內地就有大約300間加盟店。所以佢畢業後，冇繼承爸爸嘅事業，亦冇從事心理及法律方面嘅工作，反而係做模特兒及考健身教練專業資格做私人健身教練。Cathy身高170cm，身材纖瘦又高挑，參選2021年港姐時被視為三甲大熱人選，可惜最終大熱倒灶。Cathy加入無綫半年，已經可以參與劇集拍攝工作，第一次客串就有唔少戲份，睇嚟公司都睇好佢啦！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！