周正毅金毛look直播帶貨 網民感嘆 周曾與楊恭如來往 大婆毛玉萍當眾掌摑情敵

曾被稱為「上海首富」嘅周正毅，早前為內地直播主于文紅參與直播活動，幫新疆農產品帶貨。並以一頭金髮示人，同以往形象大不同，而且仲同于文紅鏡頭前明flirt，話自己同于文紅可以係「另一種朋友」。有網民認為當年商界大佬，而家都要帶貨，形容「人生盡頭是帶貨」。

周正毅當年叱吒一時，但香港人最記得嘅可能係周同當時太太毛玉萍，以及前亞姐楊恭如嘅三角關係。當年有傳周正毅同楊恭如過從甚密，楊恭如前經理人文雋曾大爆周正毅曾承諾楊恭如會離婚，令楊恭如信到貼貼服服。而婚姻被介入嘅毛玉萍就傳出喺香港「巧遇」情敵而大打出手。早前毛玉萍喺社交平台大方承認當眾掌摑楊恭如，並表示「對我只是做了很多女人想做而不敢做的事」。

毛玉萍指周正毅因為楊恭如媽媽介紹而認識楊，後來楊揸法拉利去橫店探班，仲幫女方喺香港租住月租12萬嘅豪宅，同謝霆鋒係樓上樓下。毛玉萍聲稱楊恭如試過打電話俾佢，仲稱呼周正毅「我老公」，毛覺得對方過份，喺電話同楊講「我只要見到你，我就會打你一頓」。後來毛玉萍真係喺香港遇見周正毅同楊恭如，毛立即上前掌摑對方，而據毛所講，周正毅當時已經「溜走了」。

周正毅曾是香港上市公司上海地產前主席、農凱集團前董事長，在滬港兩地非常高調；後來因捲入上海社保案等事件，被內地當局控以行賄等罪名，最終判監16年，到2020年出獄。周至今仍被香港廉政公署通緝。

至於獲周正毅加持嘅于文紅同樣係具爭議性人物，于自稱結過5次婚，而且多次整容，甚至直認不諱話「我的臉就是我們企業的信用」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！