呂奇由小生變艷情片導演 失聯多年4月傳出壞消息惹揣測？

資深傳媒人汪曼玲喺youtube頻道發放新片，提及相識多年嘅粵語片明星呂奇，講起二人交情，更爆出驚人消息，指今年4月曾由朋友圈中得知呂奇不在人世嘅消息，但至今仍未能證實。

本名湯覺民嘅呂奇，1965年憑粵語片《公子多情》走紅，成為當年嘅男神。之後呂奇同當時得令嘅玉女陳寶珠以情侶檔合拍多套電影，人氣再上一層樓。不過後來粵語片聲勢不如前，呂奇轉戰台灣仲轉做導演，更一改幕前公子哥兒形象，執導有裸露鏡頭嘅艷情片，以當年風氣而言絕對引起嘩然。呂奇80年代中期開始絕跡娛圈，同第二任太太喺台灣低調生活，曾被傳轉行揸的士，但「奇哥」一度否認傳言。

汪曼玲喺自己嘅youtube節目中提到，同呂奇多年來仍有聯絡，更5次喺台灣見面，對上一次係2019年。但係汪曼玲話自前年起雙方失聯，去到台灣打電話俾呂奇都搵佢唔到。汪更表示「2024年4月，香港及台灣的朋友輾轉傳來呂奇逝世的傳聞。一直半信半疑，並嘗試花時間，不斷多方求證。可是，奇哥這30多年定居台灣，作風低調，除了至親好友，甚少與外間聯絡。至今未能找到任何確實的答案。」

汪曼玲提到，1998年時媒體傳出呂奇喺台灣揸的士嘅傳聞，佢透過台灣朋友了解，得知呂奇喺台北大直區開餐廳，更得到奇哥手提電話，於是打去碰運氣，點知真係搵到呂奇，甚至俾汪曼玲上佢屋企訪問。汪曼玲得知呂奇曾於法國、新加坡及加拿大等地生活，最後決定留喺台灣，因為台灣冇咩人識佢，佢可以過自己想要嘅平靜生活。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！