愛回家︱單立文年輕有型look勾起集體回憶 網民:豹哥後生係真係堅型
TVB處境劇《愛·回家之開心速遞》向來都係收視之冠,搞笑又溫馨嘅劇情深得觀眾喜愛,不過日前楊明正式登場,疑似引發「楊明效應」,收視暴跌1.7點,最高收視僅得20.9 點(約134 萬觀眾)。唔知係唔係要吸引返觀眾嘅關係,前晚(12日)就派出單立文救亡,並有佢年輕嘅有型look,結果真係成功引起網民熱烈討論,及勾起大家嘅集體回憶。
前晚劇情就講到路小小(羅毓儀飾)被熊樹仁(單立文飾)嘲笑攝影技術唔掂,於是佢就睇書「惡補」攝影技術,無意間喺一本30年前嘅攝影雜誌中見到才貌兼備嘅靚仔攝影師Pierre Hung,路小小對佢一見鍾情,仲不停搜尋對方,希望可以見佢一面,可惜搵唔到任何關於Pierre Hung嘅資料。佢之後仲為呢位夢中情人寫咗一本小說,而熊尚善(滕麗名飾)睇到書內刊出嗰個人嘅照片,原來呢個人就係佢阿叔熊樹仁。
劇集出街後,一班網民除咗大讚搞笑之外,仲勾起大家嘅集體回憶,紛紛留言大讚年青時代嘅單立文靚仔,例如「年青時的熊樹仁好靚仔吖,今集要加分,好好笑。」、「年青時代單立文的確有型俊俏, 配合這點令今集特別有趣.」、「豹哥年輕時感覺浪漫帶點不羈 而家變得成熟穩重」、「Pal哥後生時所飾演嘅千歲情人 聶焰的確係好cool好型仔」、「熊樹仁年輕時確實有型,俊俏中隱藏著一絲絲邪氣,實屬少見」、「樹仁當然有型啦,假假地都拍過西門慶喔」、「豹哥當年型英帥到所有韓國Oppa 都要行埋一邊」、「豹哥後生係好型仔」、「唔講得笑,豹哥後生係真係堅型 侯賽因叔叔」及「後生真係好靚仔 成個浪子咁」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!