愛回家｜羅毓儀用盡心計勾引Terry 戲份增多惹網民不滿：擺明要推佢上位

28歲羅毓儀（Yuki）入行逾5年，去年於TVB劇集《下流上車族》飾演林敏驄和江美儀女兒，曝光率急升；之後又被安排喺《神耆小子》中飾演鄭則仕孫女「金多多」，發揮機會多。不過，近日就被網民批評喺TVB處境劇《愛·回家之開心速遞》戲份過多，疑似有意安排捧羅毓儀上位。

羅毓儀於《愛·回家之開心速遞》飾演「路小小」，一臉楚楚可憐嘅樣子其實充滿機心，明知Terry（李偉健飾）對Fanny（張盈悅飾）有好感，都要用盡心計想要釣到呢隻金龜。近日，劇集多集都以路小小勾引Terry嘅劇情為主題，包括路小小故意模仿Fanny平日裝扮以博取Terry嘅偏愛、手持啊壯（焦浩軒飾）大學時期裸照威逼對方成為約會陪練對象，務求幫佢追到Terry等等；反觀Fanny就少咗好多戲份，網民對於劇組呢個安排極不滿，又覺得劇情太故意捧羅毓儀，指路小小鍾意Terry太不合情理：「呢期擺明要推羅毓儀上位，幾乎個個星期都有佢擔正的情節」、「覺得路小小鐘意terry太神奇」、「適可而止就可以，多咗就會令人反感」、「睇小小越憎他。未見過有呢種賤女子。本來我很喜歡睇愛回家，但是一見那個小小就關TV，不合情理，週圍的朋友無一個去踢穿。」、「路小小感覺好有『心機女』feel」等等。

不過都有網民覺得比起張盈悅，羅毓儀演技比較自然舒服，同埋越來越鍾意Terry同路小小呢pair：「個演員做得唔錯，只係角色唔討好，港女性格」、「有路小小先好睇」、「其實講笑位，羅鈺怡（毓儀）做得好笑好多。阿怪雞（張盈悅）其實真係唔係好識做喜劇」、「但係寧願睇路小小都唔睇怪雞喎」、「演員上位係好事，角色俾人討厭好無奈囉，路小小幾時才會變好呀，羅毓儀加油」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！