《愛·回家之開心速遞》下星期有全新主題曲 大家最想邊個唱？

無綫處境劇《愛·回家之開心速遞》自播出以嚟深受觀眾歡迎，贏盡口碑及收視，除咗令到唔少劇中演員成功入屋之外，劇集更添食再添食，有望打破《真情》嘅紀錄。劇集主題曲由黃心穎主唱嘅《在心中》因「安心偷食」事件爆出後，無綫火速順應民意，抽起咗改用純音樂。不過可能晚晚播嘅關係，首歌嘅背景音樂實在太深入民心，始終令到好多網民聯想起黃心穎嘅聲音。有消息指《開心速遞》喺下星期一（24日）開始有全新主題曲，咁主唱人又會係邊個呢？

有消息指下星期一開始播出新主題曲，不過監製及劇中演員都好口密，齊齊大賣關子。消息一出，唔少網民希望劇組搵由75歲「熊樹根」劉丹、70歲「龍敢威」羅樂林、63歲「譚道德」陳榮峻同埋69歲「馬豹」黎彼得組成Hip Hop男團「大四喜」嚟主唱。據知今次搵咗8位演員去唱呢首主題曲，咁都啱嘅，起碼令到主題曲有代表性，觀眾亦會睇得更加投入。

其實劇集中都有唔少演員做過歌手，例如滕麗名、張景淳、單立文、鄭世豪及張明偉等等，所以佢哋都好大機會有份唱呢首新嘅主題曲。

滕麗名

1995年參加新秀歌唱大賽，憑獻唱《愛與痛的邊緣》成功進入前8名，同屆更有陳奕迅及楊千嬅，實力非凡，不過可惜最後無緣入最後5強。同年，滕麗名以旁聽生身份入讀無綫藝員訓練班。畢業後，滕麗名主唱多首兒歌，當中卡通片《咕嚕咕嚕魔法陣》嘅主題曲《魔法咕嚕咕嚕》成為佢嘅代表作。

張景淳

喺2003年，張景淳以組合Cheers身份出道，並推出《十年約會》等歌曲，深受唔少80後歡迎，不過可惜當時公司遇到官司問題，最終被逼停止營運，令到佢嘅歌唱事業夢碎。之後，佢喺2007年加入無綫，主要係擔任主持及演員工作。

單立文

單立文（豹哥）受音樂世家影響，自小鍾意音樂。早喺1983年，佢已經跟唐龍、黃良昇及蘇德華組成香港樂隊Chyna，並擔任低音吉他手。四年後佢同黃良昇、蘇德華再組成另一樂團「藍戰士（Blue Jeans）」，同樣擔任低音吉他手。

鄭世豪

2013年參加《星夢傳奇》奪得亞軍，同年11月更正式加盟唱片公司，成為歌手。2016年更決心自資推出歌曲， 同年9月「星娛樂」唱片公司邀請世豪加盟，憑派台歌《仍堅持》，奪得新人獎及歌曲獎項。

張明偉

張明偉係樂隊Charming Way嘅主音及吉他手，樂隊前身名Leohart更於香港青年樂隊大賽2013奪得冠軍。張明偉最擅長就係作曲、唱歌、吉他及彈琴，一個動靜皆宜嘅男仔。而家佢除咗拍劇之外，佢仲會定期將自己創作歌曲同翻唱歌曲版本上載上網與網民分享。

除咗以上大熱人選之外，大家又最想邊個主唱呢？