懸崖上拍攝你試過未？

為咗寫呢篇blog，你可以去到幾盡？早個星期收到攝影師朋友 Kenji 來電，問我有無興趣跟佢去玩遊繩咁話，難得有機會梗係應承去住先啦。當日，背負住相機鏡頭，去到石澳大頭洲先發現中伏，因為真係好曬好熱，不過都值得嘅。首先要學嘅就係遊繩下降，憑著Kenji 叔叔嘅悉心教導，由從來唔識到可以控制游繩下降，其實亦不太難。不過，要在懸崖游繩落崖，需要體力之餘，不畏高必然係一大優勢。遊繩落到黎之後，四圍走走見到呢個景觀，簡直唔相信自己身處喺香港。若果唔係扣起安全帶，相信我都唔敢企到懸崖邊影呢一張相，哈哈！單係架設呢一個安全嘅繩索結構，已經用上幾個小時及大量人力，加上反覆試驗以確保安全。此時此刻先發現，原來今日除咗學遊繩下降之餘，係要幫手影相～佢係導師 Sam，印象：安全至上。呢到唔同嘅繩同扣等於人嘅命，每一樣野都係保障安全，據說藍色繩更可承受高達幾噸重的力量架設好唔同嘅主繩索結構之後，組員就開始玩懸崖飛索，喺幾十米嘅懸崖上飛索感覺係點？雖然我未有機會試玩，不過有圖有真相……

相信呢張相已經解答咗唔少問題，8歲嘅小妹妹已經可以玩懸崖飛索架喇！

其實當日除咗跟大隊玩遊繩、飛索之外，亦都請黎傳媒採訪，傳媒方面更請黎model參加T形游繩拯救體驗。睇住一行幾人喺兩個山頭上大灑汗水，務求令model吊落6-70米深嘅懸崖之餘，亦可將佢安全地吊回地面。

由下吊的起點至海平面有足足6-70米深！

model與人面石(兩道懸崖之間的石塊)

成功歸來，在對面懸崖著陸

拍攝日之前其實成個星期都係落雨，好彩當日天氣唔錯，可以喺最好嘅情況拍攝。雖然地點就腳，不過要前往拍攝，都有一定危險性，最好都係有教練兼且做足安全措施嘅情況下先好喺到影相啦……

器材提供：SIGMA HONG KONG

(文、圖:Zulu Lo)

如果你喜歡我的文章，可以讚好我的facebook專頁: http://www.facebook.com/Zulu.PPG

個人網頁：http://www.zulu1px.com/
500px : http://500px.com/ZuluLo