戴利Tom Daley退役2年後復出奪銀牌 因為阿仔一句說話再上跳水台︳巴黎奧運

睇奧運當然要睇靚仔，英國跳水運動員戴利(Tom Daley)今屆繼續參賽，並成為英國隊持旗手。唔經唔覺，當年2008北京奧運以14歲之齡參加奧運一鳴驚人嘅戴利，原來已經係五朝元老，今年30歲嘅佢喺今屆奧運男子雙人10米高台跳水奪得銀牌，成為佢個人第5面奧運獎牌。

上屆東京奧運戴利喺男子雙人10米高台跳水取得首面金牌後，以27歲之齡宣布退役，甚至有2年時間冇參加任何跳水比賽。今次復出係因為一條片，同埋囝囝Robbie一句話。

戴利同美籍製片人丈夫Dustin Lance Black有2個仔，有次佢地一家人去到美國科羅拉多泉一個奧運博物館，館內播放一段影片係提到「成為奧運選手代表什麼」，令到戴利相當激動。而大仔Robbie就同爸爸講「我想睇到你喺奧運會跳水」，就係咁令戴利決定重返賽場。去年12月戴利正式復出，同今次比賽嘅拍檔Noah Williams一同集訓2個月，並且取得英國隊奧運資格。

戴利話個仔叫到，佢當然會去做，而且認為今次參賽有更大意義，只要能夠喺愛人同2個仔面前跳水，已經係今次出戰最大成就。喺新冠疫情期間，戴利培養出編織嘅興趣，上屆同今屆奧運都見到佢喺觀眾席織嘢，而戴利更加開多個IG帳戶分享編織作品，名符其實係一個暖爸！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！