手下留情 怕傷蘇皓兒 伍詠薇陰森恐怖嚇親細路女

藝人伍詠薇（伍姑娘）在《金宵大廈2》的心寒演出備受讚賞，昨日她為劇集宣傳時透露收到朋友「投訴」指她嚇親女兒，又指跟蘇皓兒拍打鬥戲壓力大，怕誤傷對方靚樣。

陳山聰、伍詠薇、蘇皓兒（Chloe）及張彥博等昨日出席熱播劇《金宵大廈2》的宣傳活動。伍姑娘與Chloe在單元中飾演母女，演技獲觀眾激讚，伍姑娘的陰森表情更被網友推舉為羅蘭接班人，她笑言：「我接到就勁，接到就做埋影后。」她盛讚劇本好，營造到驚慄感：「我朋友打畀我，話佢個女睇完嚇親，叫我氹番佢個女。」至於Chloe直言戲內很驚伍姑娘，但戲外就不會，因為伍姑娘對她很好，又講得笑。伍姑娘坦言向監製自薦演出，但自己形象開心，曾擔心駕馭不了角色，現獲觀眾好評，已感有所交代，不過她表示不會再接類似角色，否則無驚喜。

另外，「母女」前晚於劇集播出後在社交網開直播，Chole表示第一次接到如此多內心戲的角色，大感壓力。她們對浴室打鬥及街頭重聚兩幕最為深刻，伍姑娘指浴室打鬥一幕事前排練了多次：「有壓力㗎！你咁靚女，真係驚錯手打傷你。」

山聰露股 一次就夠

至於山聰透露只有歲多的兒子Jaco也有追看該劇：「有一集係我同施嬅喺中環落住雪咁錫，好浪漫，囝囝睇到眼定定，然後走去錫媽咪，成件事好Sweet，唔知佢係想模仿，定係見我錫第二個人所以想安慰媽咪。佢每晚聽到劇集主題曲就會企定定睇劇，佢唔知咩係恐怖，未識驚。」山聰在劇中露股上陣，問到若收視好會否再露？他笑言：「矜貴嘅嘢騷一次就夠，仲有好多嘢未騷，好似腹肌，但等我練好先。」