手快po錯親密照？ 洪卓立疑自爆與《膠戰》Hillary劉沛蘅拍拖

尋晚ViuTV節目《膠戰》第2季播完最後一集，觀眾睇到尾見到「未完待續」4個字，以為已經係彩蛋，點知原來仲有驚喜。

有眼利網友睇洪卓立Instagram嘅限時動態，見到佢post咗張以「男友視角」拍攝「六膠」成員之一Hillary劉沛蘅攬狗仔嘅相，疑似係立立一時手快將私藏照post出公海！

最妙嘅係立立好快手就刪咗張相，成件事立即相當可疑。而Hillary以前都po過同狗仔合照，同立立po嗰隻好接近！

洪卓立3年前去日本拍攝歌曲《數寄屋橋次郎》及《喜劇收場》嘅MV，女主角正正係劉沛蘅，當時洪卓立同舊愛湯怡分開冇耐。假如當時已經撻著，戀情收埋2年幾都冇人知，好嘢。

今年30歲嘅Hillary原來入行12年，起初係做model，同熊黛林、Angelababy屬同一經理人公司，曾被稱為「翻版薛凱琪」。後來轉戰電視圈，到參與《膠戰》先為人認識。Hillary同狄易達曾經拍拖5年，到2014年分手，有傳因為Hillary家底唔錯，男方難忍女友小姐脾氣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！