5間拉麵小店合集 醬油蝦濃湯拉麵、元朗小店奶白色豚骨湯

呢幾個月都有唔少來自日本嘅過江龍拉麵抵港，但其實香港都有唔少拉麵小店值得大家去探索！今期搵咗5間拉麵小店畀大家，間間都有自己嘅獨門秘方，真係要bookmark低逐間試呀～

醬油蝦濃湯拉麵 植幕宵

專注做一樣嘢，質素當然有保證～呢間獨沽一味只賣醬油蝦濃湯拉麵，蝦湯底極濃，但唔係鹹嗰隻濃而係鮮甜，食得出真材實料，另帶有少少薑汁香氣，湯汁加咗打碎嘅蝦肉同櫻花蝦，上枱後店員更會淋上秘製蝦油，鮮上加鮮。兩隻大蝦以微辣醬油醃製，醬油嘅甜味又突顯到蝦嘅鮮甜，推介大家一定要加溏心蛋，全隻都流心㗎。大食嘅朋友都冇有怕，可以免費加點替玉，替玉湯頭係較清澈嘅醬油蝦湯，係另一種嘅好味！

大叔主題拉麵店 大叔拉麵

以人氣插畫「Chubby Ojisan 江大叔」為題的日式拉麵店，主打和牛骨湯同雞白湯拉麵。和牛骨湯用上40kg嘅和牛骨以慢火熬製12小時而成，入口清澈醇厚，好香牛味。推介食呢個鹿兒島和牛紫菜牛骨湯拉麵，鹿兒島和牛片肉質好嫩滑又軟，輕輕炙燒過牛脂味更香。雞白湯拉麵湯底好濃郁又creamy，感覺到啖啖膠質。特別一提溏心蛋都好出色，蛋白非常入味仲有淡淡嘅酒香～

只賣三款拉麵 麺処一家

另一間貴精不貴多嘅拉麵店，全個菜單只有三款拉麵畀大家揀，湯底就只係得濃厚豚骨魚介醬油再分別配炙燒豬腩肉或慢煮豬肩肉或兩款都有齊！第一次去嘅梗係推介有兩款餸嘅，慢煮豬肩肉顏色粉嫩，口感軟腍，調味充足同時不失肉本身香氣。炙燒豬腩肉經過火炙後，添有淡淡焦香風味，肥瘦分佈均勻，厚薄啱啱好。

八小時熬煮豚骨湯 和拉麵

位於大埔嘅街坊拉麵店，人氣博多豚骨原味拉麵，湯底清清地入口順滑，豚肉味濃郁而不覺膩，正正係博多拉麵嘅特色。麵條屬於比較幼身嗰隻，師傅煮得啱啱好仲有咬口，叉燒做得薄之餘都幾香口～辛辣拉麵係另一人氣之選，湯底唔係辣粉嗰種死辣，味道好香！

元朗低調拉麵店 一人前拉麵

屹立於元朗已經十幾年嘅拉麵小店，餐牌十年如一，白前即係豚骨湯底，味道香濃得嚟又唔油，配料有叉燒、溏心蛋、筍及黑木耳等，叉燒呈微微粉紅肉質嫩滑。想再惹味啲可以試下「灯火」，豚骨湯中加入辣味噌肉球，辛辣嘅味道慢慢地滲出，香辣又惹味～

文: Yanica