摩洛哥風裝修+露天座位 旺角異國風新店 推介芝士焗龍蝦意粉+Tiramisu

OpenRice開飯喇
·3 分鐘文章
摩洛哥風裝修+露天座位 旺角異國風新店 推介芝士焗龍蝦意粉+Tiramisu
摩洛哥風裝修+露天座位 旺角異國風新店 推介芝士焗龍蝦意粉+Tiramisu

旺角呢間新開嘅樓上酒吧餐廳好有潛力成為打卡熱點：中東、摩洛哥風格裝修，室內有沙地同水池，亦有室外座位可以喺度假風嘅梳化上Chill下！環境出色、食物都有水準，芝士焗龍蝦意粉啖啖惹味，Tiramisu仲有搶眼瀑布效果，配返壺花茶或者杯Cocktail就啱晒。

Subtle Island位於旺角，係同區土耳其風裝修Cafe Be Humble嘅姊妹店，延續希望令大家有離開香港嘅感覺，新店同樣以異國風格為主，從室內到室外到處都係「偽旅行」打卡點！

火焰白酒煮藍青口（$128）
火焰白酒煮藍青口（$128）

即席將白酒點火再淋上去，有火焰視覺效果仲會帶出白酒香氣！新鮮活青口加羅勒、蒜、洋蔥、雞湯等煮熟，入口既有鮮味、亦有白酒同香草香氣。青口肉唔算好大，但勝在飽滿、口感軟滑。

扒虎蝦，北海道帶子，牛油果伴雜菜沙律（$150）
扒虎蝦，北海道帶子，牛油果伴雜菜沙律（$150）

大大隻又爽彈嘅越南虎蝦，同半熟軟嫩嘅北海道帶子下面，係用牛油果、中東米、紅波椒製作嘅沙律，中東米有飽足感，同時比起白米有更多膳食纖維又更低卡！撈埋一齊食口感層次豐富，味道清爽。

鮮茄米形意粉伴芝士焗龍蝦（$245）
鮮茄米形意粉伴芝士焗龍蝦（$245）

驟眼睇以為係意大利飯？其實係米形意粉煮出嚟嘅意粉呀。意粉以波椒粒、羅勒、新鮮蕃茄等煮成，食落有粒粒口感、外滑內Q，醬汁茄香濃郁。上面係加咗車打芝士同水牛芝士焗製嘅拆殼加拿大龍蝦肉，入口芝士奶香同鹹味平衡，肉質爽脆。

慢煮法國豬腩（$208）
慢煮法國豬腩（$208）

另一推介係慢煮法國豬腩，揀法國豬腩係因為佢嘅層次更分明，可以食到肥肉同瘦肉各自特色。慢煮四小時後果然非常鬆化，肥肉香軟到幾乎入口即溶，瘦肉外層微脆。可以點少少蜜糖芥末醬解膩，或者食微甜綿密嘅紫薯蓉換個口味，兩者同豬腩都好夾。

香煎馬頭魚伴茴香忌廉汁（$208）
香煎馬頭魚伴茴香忌廉汁（$208）

馬頭魚嘅處理方法有啲似日本嘅立鱗燒，先炸過令上面嘅鱗片豎起，然後將下面嘅魚肉煎至上色，最後焗熟。分開咁多個步驟得出嚟嘅就係可以一啖食齊香脆有一片片口感嘅魚鱗，同細嫩軟滑嘅魚肉！茴香忌廉汁特別製作成泡泡，帶出鮮味同時感覺更輕盈。

xlxlxlxl千層蛋糕（$80）
xlxlxlxl千層蛋糕（$80）

新店繼續同人氣網店xlxlxlxl合作，千層蛋糕口味不定期更換，例如拍攝呢款係蜂蜜牛奶味。Crepe皮夠薄，每層嘅忌廉亦平整，一刀切到底完全無難度。食落有牛奶香，甜度適中唔過膩。

Tiramisu（$80）
Tiramisu（$80）

Tiramisu上層係用忌廉、Mascarpone芝士同生蛋黃製作，比較流質所以用膠片封住，一拉開就會好似瀑布咁流落嚟！底部就係用咖啡同酒以一日時間浸透嘅手指餅，食落咖啡同酒香平衡，係屬於大人嘅苦甜口味。

Gin Tonic（$108）
Gin Tonic（$108）

除咗一系列咖啡同花茶之外，呢度嘅Cocktail都好受歡迎，例如呢杯用澳洲品牌嘅蝶豆花手工氈酒調配嘅Gin Tonic，緩緩倒入Tonic Water嘅話仲會由藍色變成紫色，好夢幻！口感清爽帶少少花香，幾順喉又唔嗆。另一款Pina Colada（$108）仲會用椰子奉上，同樣打卡一流。

Subtle Island
地址：旺角西洋菜南街51號友誠商業中心4樓

文、相：Cathy.H