擔正賀歲片 碌盡人情卡 軒仔拉Jeffrey上山下海 唔敢「私有化」

張敬軒成功奪得魏浚笙（Jeffrey）的「第一次」，對他讚口不絕，更大爆有金牌導演望搭路結識，「預言」Jeffrey即將片約不絕，不過未有打算將對方羅致旗下。

張敬軒昨日偕Jeffrey在尖沙咀出席品牌活動，吸引大批Fans逼爆幾層樓。擔正英皇賀歲片《超神經械劫案》的軒仔，宣布邀得Jeffrey加盟扮演解款員，與他「出生入死」：「今次會上山下海，Jeffrey仲要濕身！都幾多動作場面，包括爆破等等，我哋兩個都要學射擊。（好多老友幫你？）簡直碌盡人情卡啦！鬼叫我好日唔擔正咩！最正係可以見到Jeffrey同王菀之嘅動作場面。（你同王菀之多唔多對手戲？）直情大打出手啦！」

軒仔表示今次以外景居多，有心理準備會拍得辛苦，問會否先操身手？他搞爛Gag說：「我哋呢啲食過吓夜粥，雖然係好耐之前『遮遮』嗰啲，好彩唔使騷肌，所以都係操練吓內心。（賀歲片係咪好大壓力？ ）反而好期待，試戲已經玩得好開心。」

合唱升Key挑機

Jeffrey則忙於操肌，笑言不想「失禮街坊」，軒仔說：「等佢問鼎新人獎啦！我就仲要做啲功課先，我另一個拍檔係白只，佢係實力派，Jeffrey係實偶派，我要諗吓自己定位喺邊。」對於Jeffrey首次拍戲便獻給他，軒仔說：「佢一定陸續有嚟，前幾日先有個金牌導演打畀我，話想認識佢，好多人話佢演戲唔錯，拍完呢部工作冚冚聲！」Jeffrey即謙稱會繼續努力。軒仔又踢爆他膽生毛：「有晚喺私人場合，佢同我合唱《春秋》，我都唱到扯蝦，點知佢升Key都唱到。（簽佢啦！）佢咁大個經理人喺度，我都係搞掂自己先。」

另外，Jeffrey前晚出席另一活動，談到與女友拍拖快將7年，問會否擔心「7年之癢」？他說：「癢一癢？未到7年，順其自然啦！」