政Whats噏:馬仲儀移民英國續做醫生 疑與宣誓有關

·1 分鐘文章
政Whats噏:馬仲儀移民英國續做醫生 疑與宣誓有關hk

本身係聯合醫院內科及老人科醫生嘅公共醫療醫生協會前會長馬仲儀,10月已離開醫院並移民到英國繼續擔任醫生。據聞,佢離開香港或因醫護可能要宣誓、社會氣氛及政府修改《醫生註冊條例》等有關。

馬仲儀回覆傳媒查詢時話香港氣壓太低,睇唔到自己希望見嘅風景,但強調佢一直都安全嘅。唔單止離開工作嘅醫院,佢亦喺10月底辭去醫委會委員職務。

話說佢出任協會會長無耐就爆發反對修訂《逃犯條例》風波,曾發聲明譴責警方喺2019年10月1日向時為中五生嘅曾志健近距離開槍,質疑係「蓄意射傷市民」。

喺舊年競逐連任協會會長時,對於政府要求公職人員需宣誓表明效忠特區及擁護《基本法》,佢回應話醫護人員最初攞牌照時需到醫委會宣誓,佢認為對醫護最重要嘅係專業知識、道德同病人,唔能夠接受醫護人員要再作宣誓,除非能證明宣誓比病人更重要。佢仲質疑宣誓嘅作用,話「如果一樣嘢係美好嘅,係人人都認同嘅,我哋需唔需要用宣誓形式代表效忠呢?」

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能