旅行就係愛情照妖鏡

旅行其實係一面照妖鏡，佢會將您自己同埋另一半嘅缺點完美反映。平時約會可能都係十個鐘以內嘅事，大家都仲有心有力去保持自己嘅形象，但去到旅行，幾厚嘅妝都要卸掉，平時幾完美嘅人都會露出缺點。

我成日覺得旅行係未來同居生活嘅縮影。人在異地要互相依靠，同時又要一齊面對一堆瑣事，睇下發唔發揮到互相幫忙照顧嘅人性光環，真係少啲愛同包容都做唔到。但亦正正係呢啲時候，最可以睇清楚自己同緊一個點樣嘅人拍拖。

朋友C之前同一個拍拖幾個月嘅男朋友一齊去旅行。旅程中有個景點係去划雙人獨木舟，出到海男朋友忽然企起身，於是獨木舟失去平衡，朋友C同佢部電話雙雙跌咗落水。當然喺有救生衣嘅情況下，係無英雄救美嘅劇情上演嘅，重點係上返岸之後，男朋友完全無問候朋友C，只係自己企埋一邊喺度檢查個電話有無事…最後，佢哋返咗香港無耐就分咗手。

當然呢個例子係比較誇張，但事實上旅行途中每日都上演緊相似嘅戲碼。

聽過有朋友喺異地同男朋友鬧交，男朋友一怒之下掉低女朋友走咗去（連埋佢地唯一一隻wifi蛋），於是朋友要喊住搵路返酒店。

旅行本身就係愛情修羅場。面對住一堆煩人嘅瑣事、意見不合、爭執等等等等，喺異地無得逃避必須面對，就考驗兩個人點樣去溝通同解決。沒有絕對正確嘅解決方法，只有大家舒不舒服，接不接受嘅方法。旅行就係見真章嘅時候，睇清對方都睇清自己，有時唔一定係對方太差，可能只係同自己期望嘅不太一樣，認清自己想要咩都係一件好事。