日本好戲甘草病逝 回顧樹木希林一生

10號颶風「山竹」風力驚人，吹倒唔少樹木、摧毀百年煤氣燈，而就喺風雨欲來嘅尋日，日本影壇傳奇樹木希林亦都因病隨風而去，終年75歲。

樹木希林係呢位好戲之人第2個藝名，佢原來以「悠木千帆」出道，後來因為上節目做嘉賓要提供物品出來拍賣，佢無嘢可以攞出來，結果攞左自己個藝名出來拍賣，就咁日元2萬就賣左個名！不過，名字算甚麼？有實力，無論叫咩名都一樣好多戲拍！

不過「賣名」一事只係樹木希林一生我行我素嘅其中一件事。根據佢本人形容，佢細個就有啲自閉傾向，不太鍾意與同齡嘅人玩，不過獨特嘅性格造就精彩嘅演技。唔算係靚女嘅佢，由年青到生命最後之時，仍然片約不斷。

佢個人生活亦過得非常傳奇，遭第二任rock友丈夫內田裕也家暴，但因為很愛很愛而寧願分居都唔離婚； 又，2004年因為視網膜剝落導致左眼失明、晚年抗癌10年等等考驗，仍然無阻佢驚人嘅作品量。最難得當然係樹木林希林對死亡嘅豁達，或許就因為佢從沒有因為世道而被磨去稜角，任性甚至乎有點狂野嘅性格，使樹木林希成為觀眾最喜愛嘅「國民婆婆」。

近年樹木希林幾乎成為是枝裕和導演嘅御用女演員，合作多達6部電影，包括《奇蹟》、《橫山間之味》、《海街女孩日記》、《誰調亂了我的父親》、《比海還深》及人生最後作品《小偷家族》。正如是枝裕和導演講過「選角決定左作品8成嘅好壞」，樹木希林演活左每個角色，可愛嘅、睿智嘅、淡然嘅，我地亦會記得呢位咁有吸引力嘅女演員。