日本8大秘境車站

日本鐵路行，其實都係一個唔錯嘅旅行方式，沿途睇到好多風景之餘，每個車站都好有特色。好多日劇、電影都會喺車站取景，令車站更添故事性。睇下8個秘境車站，下次去日本，不妨到一到。

1. 下灘車站(愛媛縣)

絕無遮擋嘅瀨戶內海景致，日落嘅最佳觀景台，建議係日落時份去Catch佢個Magic Moment。呢到多次入選青春18旅遊通票嘅宣傳海報題材，更加喺多套日劇、電影嘅取景地，所以，好多遊客慕名而黎嫁。

相片來源：yescrookedcollectionwombat , corocoro-cocoro @Tumblr

2. 驫木車站(青森縣)

唔識讀個「驫」字呢?廣東話同「標」讀音一樣，正正就喺呢個咁特別嘅中文字，令日本人對驫木車站產生好奇，喺日本人心目中嘅熱門秘境車站。一間木屋式簡陋嘅車站，周圍附近冇其他建築，令驫木車站添上一份孤寂感。面對嘅日本海，非常之近，風浪比較大果陣，啲浪會打到埋車站添。

3. 拔海車站(北海道)

木造候車室，經多次修復，都保持1924年啱啱啟用果陣嘅模樣。位於日本嘅最北端，落雪果陣，白茫茫一片，好多詩意，難怪成為日劇、電影其中一個熱門取景地。

4. 西大山車站 (鹿兒島)

講完最北端車站，日本最南端車站就喺西山大車站。面對日本百座名山之一嘅開聞岳(又稱︰薩摩富士)，景色非常壯麗。另一大特色，就喺車站有個罕見嘅黃色郵筒，喺代表宿市嘅油菜花顏色，又有傳說話，黃色郵筒會為人傳送幸福，所以成為熱門景點。

相片來源：かがみ～ @Flickr

5. 生野車站(北海道)

最初只喺臨時車站，後來先成為正式車站。冇候車室，只得月台，非常簡陋。但一落車，就喺廣袤嘅一大遍田園景色，樸素而寧靜。

6. 真幸車站(宮崎縣)

宮崎縣第一個嘅鐵路車站，1911年啟用，即喺話有105年歷史，難怪木造嘅候車室，特別有懷舊氣息。車站名又可解讀為「真正的幸福」，所以連印有車站名嘅車票都成為幸運嘅物品。站內中央更設有一個幸福鐘，可按自己嘅幸福指數，敲鐘，有幾幸福就敲幾下。

7. 保津峽車站(京都府)

大部份月台都建起保津川嘅大橋上面，從狹窄嘅月台向下望，可以將峽谷嘅壯麗景致盡收眼底。而呢條鐵路線，就喺知名嘅嵯峨野觀光鐵路，觀光列車喺冇窗嘅透明玻璃設計，車站同列車都好有特色。

8. 大畑車站(熊本縣)

圍繞險峻出岳而行嘅鐵路當中，喺日本唯一一個盤山而同時具備折返功用嘅車站。保留行駛蒸汽火車，石造嘅給水塔，就喺為蒸汽火車而建。而月台有個噴泉式水盆，正正為咗搭完蒸汽火車嘅列車長同乘客，洗一洗手同臉嘅黑煤煙。