日本Airbnb可怕經歷：醉酒房東、鬼祟摷喼

近年Airbnb比旅客多個住宿選擇，又可以貼近當地人生活，尤其適合一大班朋友圍威喂，除開每人每晚比一般酒店平少少。但其實住Airbnb，真係要睇地方同彩數，尤其係日本，唔好睇每晚價錢4百幾5百蚊，但計埋清潔費同服務費，每晚分分鐘要千幾蚊，無四個人絕對唔抵住。加上當地人規矩特別多，好似入屋除鞋、屋內唔可以拖喼、講野細聲等基本要求，只要大家唔小心睇漏眼，分分鐘為旅程蒙上污點，難怪好多人話「Airbnb住一次好了！」

1. 醉酒房東

朋友一行五人入住新大阪套房，因為新手上路，揀房時無揀房間類型，結果去到先知屋主同佢地同住一單位，公享洗手間及廚房。但每晚房東都係一個趟門之隔嘅大廳飲酒飲到面紅紅，去洗手間去到勁污糟，攪到朋友每日要先洗屎漬先可以大解，攪到佢地話呢世都唔會住Airbnb。

2. 入住難民營

有位行家，住airbnb無數，卻第一次住到好似難民營咁，入住和式榻榻米房，但拉開和式趟門後，竟然住咗一家四口台灣家庭，講緊價錢只係平酒店幾十蚊，你都咪話唔可怕！

3. 鬼祟摷喼

朋友入住東京某房，與男房東公享洗手間及廚房，諗住個喼無咩貴重物品，所以無鎖喼出去。一向整齊嘅佢，返黎發現有人摷過佢個喼，攪到佢訓覺都要抱實銀包同證件。

4. 副屋呃人

有網友去福岡，打算Book個間房明明已經full咗，點知房東叫佢地入住副屋，仲話免費車佢地去。點知間副屋離市中心最少半個鐘車，入到去，仲要有成班大學男生喺度住緊，佢地兩條女好驚驚囉！

相片來源：Tumblr@kumako365jp