日食十碗叉燒飯 300磅裝修大哥戒肉實錄

裝修大哥肥姜身高六呎，體重300磅，餓起上嚟一個下午食十碗叉燒飯，突然要佢冇肉食會點？

3名裝修大哥肥姜、肥豪同莫Wing，平日閒閒地都兩個快餐打孖一齊食。平時小編食一個快餐都要少飯，或者食唔哂薯條，點解佢哋食量驚人？佢哋最初就覺得無計啦，從事裝修呢類型勞動工作，成日要搬搬抬抬，唔食返啲肉補充體力會腳軟。   到底係咪真係咁呢？如果唔食一日肉，呢3位大哥會唔會餓到頂唔順呢？

「我今日要戒一日肉！」 佢哋接受咗一項大挑戰，就係試戒肉一日，食個蘋果就開工裝修！   勞動完一日，就算放咗工都唔准食肉，只可以食素餃子！！！   結果會係點？大家可以睇呢條片： https://www.facebook.com/betterme.magazine/videos/1983270505100113/   其實食咁多肉，對身體都唔好。三位大哥都話佢哋體重上升，膝頭將近負荷唔到，有時對腳仲會痛㖭。而近年好多醫學研究都話，大量進食紅肉會增加患心臟病同大腸癌機會，而世界衞生組職（WHO）亦已將加工肉類列為致癌物。   相反，如果食少啲肉，減磅機會都大大提升！唔止對身體好啲，減少肉類需求亦可以幫助減少全球炭排放量，對地球先生都好啲！

如果3位體力勞動嘅大哥都做到，其實你同我都一樣可以試吓架！   就算唔係全戒，有時一星期食少兩三日，都不失為一個好習慣！   好習慣傳送門