是日噏day：想贏與愛的混淆

有一個故事，關於兩女一男。

兩個女仔都算係美女，有氣質、聰明、受過高等教育，未必至於女神級數，但條件亦都絕對算係好。

如果話俾你聽，呢兩個女人爭一個男人爭到面紅耳熱，仲要一爭爭左兩年咁耐，你一定會估，咁幸運嘅男人一定好charm好靜，先至會引得到兩個咁嘅質素嘅女人為佢爭風呷醋啦。

答案係：唔係！

呢個男人更加可以講係below average。

未算係癡肥，但絕對係一個肥仔，身材有d矮，其貌不揚，係嗰種你見過幾次都未必會認得佢，個樣扁口扁面嗰種死肥仔。如果你腦內幻想嘅嗰個影像，係投射咗城中某一個好多女伴嘅富豪，你嘅想像同現實中呢個男人嘅樣，真係差唔多。只不過呢個男人並唔有錢，收入只係普通，亦唔見得有咩過人嘅才能，只係普通一個文員。唯一可取之處，就係佢幾識講嘢氹女仔。

所以其實齋睇，你係唔會想像到，會有兩個女仔咁想爭佢返嚟做男朋友。

其實事情嘅開始，係呢個男人瞞住另一半，同左另一個女仔一齊，同時又隱瞞其實自己有女朋友呢件事。所以有好一段時間，兩個女仔都以為自己係the one and only one——直至穿崩嗰日為止——兩個女人嘅戰爭，亦都從嗰日起一觸即發。

你唔會想像到，係現實生活中兩個女人要爭一個男人，情節可以有幾咁似TVB膠劇。

例如message對方，交出證據，向對手證明自己先係呢個男人嘅真愛，同你只不過係玩玩下；又或者打電話講數，叫對方唔好再破壞自己嘅幸福，唔好再做第三者咁cheap；講下講下，又會突然由惡形惡相，變成慘情家嫂，求對方放過佢哋，比條生路佢行下；又會各自向男方嘅屋企人行外母外父政策， 極盡巴結之能事，為嘅，係爭取南方屋企人嘅支持。

呢啲內情，係爭鬥之中兩個女人嘅其中一位同我講嘅。

當佢講述你的故事嘅時候，聲音眼神充滿着憤怒、好勝、憎恨——統統都係指向另外一個同佢住係同一狀況嘅女人。

縱使我提醒佢：「其實始作俑者係你條仔喎，其實對家個個女仔都係受害者。」

似乎佢都唔係好聽得入耳，接住落嚟我同佢嘅對話內容，仍然係圍繞另一個同佢爭男人嘅女人有幾衰。

我漸漸明白到，事情發展到呢個地步，可能已經唔再關個男人事，純粹係兩個女人殺紅了眼嘅泥漿摔角﹐眼裡未必有男人﹐但一定狠狠盯住另一個女人。

我亦都漸漸明白，點解明明好似一塊瘦田質素嘅男人，會可以有兩個唔錯嘅女人去爭去搶。

因為要爭贏嘅嗰份慾望，已經完全戰勝左對呢個男人本身價值嘅理性評價。

想「爭贏」嘅慾望，已經完完全全同希望同呢個男人成為伴侶嘅慾望，混淆埋一齊。

我問：「其實你原本有幾鍾意呢個男人？」

「其實我都唔知，有時諗覺得都鍾意，有時又覺得其實唔係好鍾意。我唯一知道嘅，就係我唔可以放手。我真係做唔到。所以我諗我真係好鍾意佢。」

「其實我咁樣問，係因為你未發現佢有另外一個女人嘅時候，你同我講過你覺得自己唔係好鍾意呢個男人。我更加想你諗清楚嘅係，如果他朝一日你爭贏左，另外嗰個女人完全消失，你係唔係仲仍然咁希望擁有呢個男人？如果答案係no，我想你諗諗，用兩年嘅時間，每日鬥志鬥力咁樣去爭個爛橙，你失去左幾多有可能同另一個人發展嘅機會同埋青春。」

而我知道，對於一個喺戰場上披甲執劍、殺得性起嘅人，我呢一段說話，應該好快就會俾佢拋諸腦後，但作為朋友，有啲說話，還是不得不講。

text by Tyler Li (facebook: 泰兄）

（圖片來源：youtube截圖）