是日噏day：那些IG、FB發放的悲情誘餌

[而像你這樣 每一位也心癢 ]

朋友J剛剛分手，對象係拍咗拖3個月嘅索空姐，依家嘗試緊箍煲。無等佢提起單嘢，我已經主動話：「咪鬼等啦你，夠鐘啦，收檔啦！老實講，你女朋友認真麻麻哋！3個月前，本身已經想同你講。」

朋友J：「點解咁講呢？你知道咗啲嘢？」

我：「唔係我獨家知道左啲咩，而係全世界有佢IG同FB嘅人，全部都知。自從上星期同你散咗以來，佢連續7日每日上網都有悲情發帖，日日發功。」

朋友J：「我都見到。所以我更加內疚，更加想同返佢一齊，令佢開心返。我明你諗咩，你應該係覺得，兩個人分手呢家野，唔使放上網比咁多人知吖嘛。但我覺得，佢唔開心宣洩下係正常，最起碼佢都冇將所有detail post晒上網吖。係咪？」

我：「我就係覺得，佢不斷發悲情post，但又唔講發生咩事，先至係最大獲嘅嘢。如果佢爆炸地公開數臭你，就全世界都知咩事啦，冇懸念架嘛。但係佢而家一味話唔開心，即是留一條尾巴，俾任何人私底下關心佢。無錯，佢的確對於你兩個嘅私隱同細節保持沉默，但佢呢種沉默，真係沉默得好高調囉！我估而家佢成個PM版面，已經塞滿晒唔同仔仔嘅問候留言。」

朋友J：「即係你覺得，佢網上面打嘅所謂唔開心，都係扮嘢、係假嘅？」

我：「我唔係覺得嗰啲傷心係假嘅，但傷唔傷心係一件事，佢係咪已經ready有另一個人，又或者好多人，陪喺佢身邊，氹返佢開心，又係另一件事。我覺得佢已經非常之咁ready，直頭係welcome添啊。我諗，直至佢公開唔開名劣感謝某某人，件事就可以正式全部告一段落，因為封盤程序，將會正式啟動，佢已經confirm咗下一位嘅位置屬誰了。」

朋友J：「咁點解你覺得，件事係會如你所講一樣呢？」

我：「記唔記得，3個月前你係點樣將呢位神級空姐追到手？咪就係空姐同前度分手，你上網見到，關心佢，發左功一排咁囉。你仲好開心message我，cap screen話佢post相多謝你陪喺佢身邊， 『呢舖應該得米了』。你是否需要我開返個對話紀錄出嚟俾你睇？」

朋友J：「咁即係夠鐘收皮啦？係咪？」

我：「收啦！返屋企聽周柏豪啦你！好嘢嚟架！啱晒你呢個situation！」

text by Tyler Li (facebook: 泰兄）

（圖片來源：kychan）