曹永廉加入《開心速遞》演陳師奶叔仔 性格難頂被嘲Forever Cheap

無綫處境劇《愛·回家之開心速遞》長拍長有，劇集不時會加入新角色，為觀眾帶嚟新鮮感，好似最新一集就有由曹永廉飾演嘅「陳永廉」加入，佢係劇中係「食屎陳師奶」嘅叔仔，即係陳生嘅細佬，佢滿口謊言、自私自利、為人貪小便宜，性格可以話係相當乞人憎。

噚晚劇情就講到陳永廉（曹永廉飾）因為失業嘅關係，所以就去投靠哥哥（黃志榮飾），不過就被陳生趕出家門。熊樹根（劉丹飾）一家就覺得永廉好可憐，認為係陳生咄咄相迫，於是就去搵陳生理論。點知陳生同永廉各執一詞，熊家及一眾街坊就藉著搵《慌張西望》爆料，而成功逼到陳生畀永廉返屋企。喺呢個時候，永廉終於露出真面目，原來佢一直扮可憐，最後佢仲令到根叔俾佢喺速熊返工。

今次曹永廉以真名去飾演陳永廉，去到劇集中段仲被陳生嘲笑個名永廉係「Forever Cheap」，成功令網民留下深刻印象。喺劇集尾段，陳永廉繼續留喺速熊工作，相信佢嘅戲份會陸續有來。陳永廉性格相當唔討好，而一班網民亦留言表示唔太鍾意呢個角色，例如「個角色乞人憎又唔好笑」、「曹永廉啲戲唔多掂 成集係度讀對白，又冇戲劇天分」及「唔想睇呢條線」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！