有種髮型叫柏豪頭 周柏豪髮型演變史

喺香港，有種髮型叫柏豪頭，而呢個icon就梗係周柏豪。 雖然柏豪嘅靚仔樣就唔係個個都學得到，不過佢嘅髮型就成為好多男仔嘅必學髮型。

佢嘅髮型影響力究竟有幾大？首先對好多人來講，一講起周柏豪第一件事就係諗起「柏豪頭」。如果你喺網上搜尋器搜尋「周柏豪」，亦都會即刻出現周柏豪髮型」、「周柏豪髮型教程」等關鍵字。

柏豪啱啱出道嘅時候，正值係「飛輪海」一大pat瀏海髮型興起年代，柏豪版本就剪碎少少，更有層次。之後就到飛走瀏海玩摷亂，可以話係「柏豪頭」嘅前身。到2010／11年時候，鬢角鏟青加All Back嘅Undercut，更加突出硬朗嘅臉型，令到本身嘅高顏值更加明顯，亦可以話係「柏豪頭」正式面世嘅時間。

「柏豪頭」都有進化，就係有全部頭髮一致梳all back，變成有8／2分界嘅all back，有啲懷舊「蛋撻頭」嘅味道，配合柏豪嘅成熟風打扮。

剪咗一個靚仔頭就當然要keep住啦！周柏豪無論打波打到成身汗、又或者出席活動，甚至早排《使徒行者2》要拍打戲，佢嘅髮型都屹立不倒！唔怪得知髮型產品都要搵佢幫手宣傳啦！

由森美主持嘅節目《森美搜尋器》，第一個禮拜嘅嘉賓就係周柏豪。究竟當日點解佢要梳柏豪頭？柏豪頭又係點gel出嚟？一齊睇片！