李丞責(下) 同港姐老婆劉倩婷分工教女

小孩子各有長短，需要因材施教；父母何嘗不是需要分工合作，在教養孩子方面各施所長。所以阡辰從小由爸爸輔導中文、由媽媽教英文陪讀故事書，年紀小小，中文英文普通話樣樣能說也會讀，成了家裡的小翻譯員：「學術方面我哋營造環境從旁輔助，不過最重要都係道德智慧培養，好開心呢個女雖然唔夠三歲，但係識聽道理、好有禮貌，同埋懂得分享！」

包辦前世情人湯水藥膳
以前，李丞責埋頭工作，太太劉倩婷也是把全副心機放在個人事業和慧妍雅集的公益活動上，李丞責說為人父母以後，兩夫婦都為孩子改變了很多：「老婆以前搞作多多、夜瞓啲朝早就自然懶瞓啲，依家生活作息完全因為個女改變，朝早早過個女起身，全天候陪佢玩、睇書、送佢返學帶佢周圍去，夜晚一定係睇住個女瞓到稔先至忙自己嘢，付出好多；我工作好忙，但明白父母嘅愛同健全嘅家係小朋友健康成長最強後盾，所以都一定會爭取時間朝早出門口前陪佢玩，教佢寫字、陪佢傾偈。仲有一樣嘢，太太冇我咁叻，幫阿女煲湯準備食療都係我職責。阿女出世氣管爭啲、又有鼻敏感，所以我成日都會睇好多資料，睇實佢食入口嘅嘢、煲川貝枇杷湯俾佢飲。飲湯食藥未必啱小朋友口味，一開始都要哄又要講道理。我好感恩，呢個女講過一次就明，知道係有益以後都唔會再扭計。依家好醒好自動波，一變天氣、喉嚨一有唔舒服，兩歲人仔就會行埋嚟，叫爸爸去煲湯！」

有智慧緊要過改個靚名
算命睇風水三十年，見慣了望子成龍的父母，輪到自己為人父，李丞責意識到大人的期待和比較往往會成為壓力轉介到兒女身上，其實對兒女對家庭，最根本的還是感情和睦深厚、孩子身體健康最重要：「我哋屋企唔興睇手機睇電視，主要係我同老婆睇書多，兩個人都相信學習都係最古老嗰套最啱使，睇書識字學嘢學得最快記憶訓練最好。阿女就快入學，係唔係讀名校，我覺得要睇佢能力，無需強求。返學讀書，歸根究底唔係學嘢背書咁簡單，學校其實係一個啟蒙環境，幫佢累積智慧，學識判斷是非同明辯事理。我做咗父母之後，反而好睇得開，人人質地際遇唔同，要因才施教，亦都唔可以一概而論位高權重搵到錢就叫成功。呢個女，我只希望佢活得開心，係成長過程中得到智慧、識得待人處事、有毅力將個人所長發揮到最好然後得以貢獻社會，咁就夠喇！」